ភ្នំពេញ៖ យុវជនកម្ពុជា ដែលជាសិស្ស និងតំណាងសហគ្រាស ចំនួន២នាក់ ទទួលបានជ័យលាភី ក្នុងចំណោមអ្នកចូលរួមប្រមាណជាង ២០០នាក់ មកពីបណ្ដាប្រទេសផ្សេងៗ នៅក្នុងវេទិកាឫសគល់នវានុវត្តន៍អាស៊ាន-ឥណ្ឌា ដែលបានប្រព្រឹត្តិឡើងនៅថ្ងៃទី២៨ ដល់ទី៣០ ខែវិច្ឆិកា ឆ្នាំ២០២៣ ស្ថិតនៅលើកោះឡាំងកាវី រដ្ឋកេដា ប្រទេសម៉ាឡេស៊ី ។

យុវជនកម្ពុជាទទួលបានជ័យលាភីគឺអ្នកនាង សួរ រដ្ឋាកញ្ញា ស្ថាបនិកសិប្បកម្មផលិតផលក្រដាសពីដើមចេក (Kumae Banana Paper Products) ដែលមានមូលដ្ឋាននៅខេត្តសៀមរាប ថ្មីៗនេះបានទទួលពានរង្វាន់ Promising Award ។ ចំណែកយុវជនម្នាក់ទៀតឈ្មោះ ហេង មុនីរៀម ជាសិស្សបានទទួលពានរង្វាន់ដូចគ្នា លើស្នាដៃបង្កើតគម្រោងប្រព័ន្ធកសិកម្ម (Agrimation system) ដែលគម្រោងនវានុវត្តន៍នេះ ត្រូវបានបង្កើតដើម្បីបង្កើនការអនុវត្តការដាំដុះ នៅក្នុងសហគមន៍ ដោយផ្តោតជាពិសេសលើការធ្វើសួនបន្លែតាមផ្ទះ ។

 ក្នុងឱកាសជួបសំណេះសំណាល ជាមួយក្រុមយុវជន ដែលត្រូវបានជ្រើសរើសទៅចូលរួមនៃវេទិកាឫសគល់នវានុវត្តន៍អាស៊ាន-ឥណ្ឌា ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសបញ្ជាក់ពីសារៈសំខាន់ នៃការបន្តរៀនសូត្រ និងការសហការគ្នាក្នុងវិស័យនវានុវត្តន៍ និងបានលើកទឹកចិត្តដល់អ្នកនវានុវត្តន៍កម្ពុជា ឱ្យចេះចែករំលែកគំនិតជាមួយមិត្តភ័ក្តិនៅក្នុងតំបន់ និងមិត្តភ័ក្តិមកពីប្រទេសឥណ្ឌា ព្រមទាំងចូលរួមអភិវឌ្ឍប្រព័ន្ធអេកូឡូស៊ីនវានុវត្តន៍នៅកម្ពុជា ។

ជាមួយនេះ ឯកឧត្តម បានណែនាំដល់ជ័យលាភីទាំងអស់ ឱ្យគិតមិនត្រឹមតែពីដំណើរការនវានុវត្តន៍ប៉ុណ្ណោះទេ តែត្រូវសិក្សាខ្សែច្រវាក់ផលិតកម្មទាំងមូល ដោយកំណត់យន្តការទីផ្សារ និងតួអង្គសំខាន់ៗ ដែលអាចទទួលយកដំណោះស្រាយនវានុវត្តន៍របស់ពួកគេ ហើយអ្នកនវានុវត្តន៍ ត្រូវតែភ្ជាប់ទំនាក់ទំនងជាមួយគ្នា ដើម្បីបង្កើតជាអេកូឡូស៊ី និងថានវានុវត្តន៍ត្រូវតែបង្កើតតម្លៃបន្ថែម និងត្រូវតែអាចពង្រីកផលឱ្យបានកាន់តែទូលំទូលាយ ។

គួរបញ្ជាក់ថា វេទិកាឫសគល់នវានុវត្តន៍អាស៊ាន-ឥណ្ឌា ដែលត្រូវបានប្រារព្ធឡើងជារៀងរាល់ឆ្នាំ ដោយមានការផ្លាស់វេន ក្នុងចំណោមរដ្ឋសមាជិកអាស៊ាន គឺជាវេទិកានវានុវត្តន៍ថ្នាក់តំបន់មួយ ដែលគាំទ្រដោយសាធារណរដ្ឋឥណ្ឌា ហើយសម្រាប់អ្នកនវានុវត្តន៍ក្នុងប្រទេសកម្ពុជា ដែលត្រូវបានជ្រើសរើសឲ្យចូលរួម គឺត្រូវបានសម្របសម្រួលដោយលេខាធិការដ្ឋាន នៃគណៈកម្មាធិការវិទ្យាសាស្ត្រ បច្ចេកវិទ្យា និងនវានុវត្តន៍អាស៊ាន នៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ របស់ក្រសួងឧស្សាហកម្ម ។ 

ដោយនៅឆ្នាំនេះ ជ័យលាភីសិស្សចំនួន ៥នាក់ និងជ័យលាភីសហគមន៍ចំនួន ៥នាក់ ត្រូវបានជ្រើសរើស ដើម្បីបង្ហាញពីនវានុវត្តន៍របស់កម្ពុជា និងផ្តល់ឱ្យកាសដល់ពួកគេ ក្នុងការរៀនសូត្រ ប្រមូលការយល់ដឹងបន្ថែមពីវិស័យនវានុវត្តន៍ ពីបណ្តាប្រទេសអាស៊ាន និងសាធារណៈរដ្ឋឥណ្ឌា ៕ អត្ថបទ បាន សុខរិទ្ធិ