ភ្នំពេញ៖ មន្រ្តីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា គិតចាប់ពីខែមករា រហូតដល់ខែវិច្ឆិកា ឆ្នាំ២០២៣ យុវជនប្រមាណជិត ៦ពាន់នាក់ ទទួលបានការងារធ្វើតាមរយៈទីភ្នាក់ងារជាតិមុខរបរនិងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ។ 

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅក្នុងបណ្តាញសង្គម នៅរសៀលថ្ងៃទី៦ ខែធ្នូនេះ បានបញ្ជាក់ថា គិតក្នុងរយៈពេល ១១ខែ ឆ្នាំ២០២៣ ក្រសួងបានទទួលអ្នកចុះឈ្មោះស្វែងរកការងារធ្វើចំនួន ២៧,២៤០នាក់ ក្នុងនោះក្រសួងបានផ្គូរផ្គង និងបញ្ជួនអ្នកស្វែងរកការងារធ្វើទៅនិយោជកចំនួន ២៧,៣៧៧ដង ដោយអ្នកស្វែងរកការងារធ្វើទទួលបានការងារធ្វើមានចំនួន ៥,៨៧៨នាក់។ 

ឯកឧត្តម បានរៀបរាប់ឲ្យដឹងថា ក្នុងចំណោមអ្នកទទួលបានការងារធ្វើទាំង ៥,៨៧៨នាក់នេះ មាននៅខែមករាចំនួន ១៤០នាក់, ខែកម្ភៈចំនួន ១៦៧នាក់, ខែមីនាចំនួន ២៦៥នាក់, ខែមេសាចំនួន ២៣៩នាក់, ខែឧសភាចំនួន ២៣១នាក់, ខែមិថុនាចំនួន ៤៣០នាក់, ខែកក្កដាចំនួន ៦៤០នាក់, ខែសីហាចំនួន ៧០៧នាក់, ខែកញ្ញាចំនួន ៥០៣នាក់, ខែតុលាចំនួន ១,៩៩៣ និងខែវិច្ឆិកាចំនួន ៥៦៣នាក់។

ឯកឧត្តម កត្តា អ៊ន បានបញ្ជាក់បន្ថែមថា ក្នុងអាណត្តិទី៧នេះ ក្រសួងការងារ បានបង្កើតវេទិការពិពរណ៍ និងផលិតភាពថ្នាក់ជាតិ ការរៀបចំសិក្ខាសាលាស្តីពី ណែនាំអាជីពជ្រើសរើសសិក្សា សម្រាប់សិស្សមធ្យមសិក្សាទុតិយភូមិ និងនិស្សិតសាកលវិទ្យាល័យ និងបានបើកវគ្គបណ្ដុះបណ្តាលស្តីពី ការត្រៀមលក្ខណៈសម្បត្តិ ក្នុងការស្វែងរកការងារធ្វើ ដល់យុវជន រួមទាំងការដាក់ឱ្យដំណើរការនូវមជ្ឈមណ្ឌលការងារចល័តនៅរាជធានីភ្នំពេញដើម្បីផ្តល់ឱកាសការងារជូនដល់ពលរដ្ឋនៅតាមមូលដ្ឋានថែមទៀតផង៕ ដោយ ៖ បូរ៉ាវី