កំពង់ឆ្នាំង៖ ផ្លូវមួយខ្សែទំហំទទឹង២ម៉ែត្រ១តឹក និងបណ្តោយមាន១០៩ម៉ែត្រ៦តឹកនោះ ត្រូវបានបើកអោយប្រជាពលរដ្ឋអាចធ្វើដំណើរទៅមកដោយសេរី មិនមានផលរំខានដូចមុនទៀតឡើយ ក្រោយពីសាលាឧទ្ទរហ៍បានចេញរូបមន្តអនុវត្តសាលដីកាលេខ២៨០/២០២២ អោយអនុវត្តដោយបង្ខំ តាមខ្លឹមសារនៃសេចក្តីសម្រេចបញ្ចប់ទាំងមូល នៃសាលដីការដ្ឋប្បវេណីលេខ០៧ ក្រ.lll,ឌ រ ចុះថ្ងៃទី១៦ ខែកុម្ភៈ ឆ្នាំ២០២២របស់សាលាឧទ្ធរហ៍ភ្នំពេញ។ ការអនុវត្តសាលដីកាសាលាដំបូងនេះ បានធ្វើឡើងពេញ១ថ្ងៃ នាថ្ងៃទី០៦ ខែធ្នូ ឆ្នាំ២០២៣នេះ។

 តំណាងប្រជាពលរដ្ឋទាំង៣៩គ្រួសារ បានសំដែងនូវទឹកចិត្តសប្បាយរីករាយ ក្រោយបានឃើញសាលដីកាបង្គាប់អោយអនុវត្តនេះ ហើយក្នុងនាមជាប្រជាពលរដ្ឋដែលរស់នៅខាងក្រោយភូមិមួយនេះ មិនមានផ្លូវធ្វើដំណើរ បានបង្ហាញការពេញចិត្តនូវការយកចិត្តទុកដាក់ពីសំណាក់ប្រព័ន្ធតុលាការ ក្នុងរាជរដ្ឋាភិបាលដែលដឹកនាំដោយសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។ ពួកគាត់បានថ្លែងអំណរគុណដល់សាលាឧទ្ទរហ៍ភ្នំពេញ សាលាដំបូងខេត្ត អាជ្ញាធរខេត្តស្រុកឃុំភូមិ រួមនិងកងកម្លាំងដែលបានអនុវត្តតាមសាលដីកានេះ។

 លោក កែវ វាន្នី ព្រះរាជអាជ្ញារងអមសាលាដំបូងខេត្តកំពង់ឆ្នាំង ដែលបានដឹកនាំក្រុមការងារ ចុះអនុវត្តសាលដីកាសាលាឧទ្ទរហ៍នេះ បានអោយដឹងថា៖ នៅថ្ងៃនេះ ក្រោយពីប្រជុំគ្នារួចរវាងអាជ្ញាធរខេត្ត ស្រុកឃុំភូមិ ការិយាល័យដែនដីស្រុក និងកងកម្លាំង ក្នុងនាមតំណាងអយ្យការ និងជាមន្ត្រីទទួលបន្ទុកកិច្ចការអាជ្ញាសាលា នៃអយ្យការអមសាលាដំបូងខេត្តកំពង់ឆ្នាំង បានដឹកនាំគណៈកម្មាការចម្រុះ ចុះដល់ទីតាំងអនុវត្តជាក់ស្តែង ស្ថិតក្នុងភូមិចំការតាម៉ៅ ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ដោយតំរូវអោយបើកផ្លូវច្រកចេញចូលរបស់ប្រជាពលរដ្ឋទាំង៣៩គ្រួសារមានទទឹង២ម៉ែត្រ១តឹក និងបណ្តោយប្រវែង១០៩ម៉ែត្រ៦តឹក វាប់ពីពេលនេះតទៅ។ ក្នុងការអនុវត្តសាលដីកានេះ ទាំងកូនបំណុល និងម្ចាស់បំណុល មិនបានបង្ករទំនាស់ណាមួយកើតឡើងនោះឡើយ។ ការបើកផ្លូវច្រកចេញចូលខាងលើនេះ គឺសម្រាប់ប្រយោជន៍សាធារណៈ ស្របតាមខ្លឹមសារនៃសាលដីការរដ្ឋប្បវេណីលេខ ០៧ ក្រ.lll,ឌ រ ចុះថ្ងៃទី១៦ ខែកុម្ភៈ ឆ្នាំ២០២២របស់សាលាឧទ្ធរហ៍ភ្នំពេញ។ ចាប់ពីពេលនេះតទៅ គូភាគីនៃសំណុំរឿងនេះ អាចយកកំណត់ហេតុស្តីពីការអនុវត្តដោយបង្ខំបើកច្រកចេញចូល តាមអំណាចសាលដីកានេះ យកទៅប្រើប្រាស់បានស្របតាមផ្លូវច្បាប់ ៕ កាំង វាសនា