កិច្ចចរចារដែលសម្របសម្រួលដោយអារ៉ាប៊ីសាអ៊ូឌីត និងអាមេរិក មានបំណងបញ្ឈប់ការប្រយុទ្ធគ្នារវាង   ភាគីសង្រ្គាមរបស់ស៊ូដង់ បានបរាជ័យម្តងទៀត ហើយកងទ័ពរបស់ប្រទេសនេះ និងកងកម្លាំងយោធាប៉ារ៉ាគាំទ្ររហ័ស(RSF) បានបន្តយុទ្ធនាការយោធា ដែលបណ្តាលឲ្យមានវិបត្តិមនុស្សធម៌ដ៏ធំមួយ។

កង្វះនូវភាពរីកចម្រើននៅក្នុងកិច្ចពិភាក្សា នៅទីក្រុងចេដដា (Jeddah) បានធ្វើឲ្យបាត់បង់ក្តីសង្ឃឹមសម្រាប់ការដោះស្រាយជម្លោះដែលបានផ្លាស់ទីលំនៅមនុស្សជាង៦,៥ លាននាក់ នៅក្នុង និងក្រៅប្រទេសស៊ូដង់ ធ្វើឲ្យសេដ្ឋកិច្ចធ្លាក់ចុះ និងបង្កឲ្យមានការសម្លាប់រង្គាលដែលជំរុញដោយជនជាតិភាគតិចនៅតំបន់ដាហ្វឺ។

កងទ័ពរបស់ស៊ូដង់ បានបង្កើនវោហាស័ព្ទរបស់ខ្លួន ហើយក្រុមអ្នកស្រុក និយាយថា ខ្លួនបានបង្កើនការវាយប្រហារតាមអាកាស នៅក្នុងរដ្ឋធានីខាទុំ (Khartoum) ខណៈដែលគូប្រជែងរបស់ខ្លួនគឺ យោធាប៉ារ៉ា RSF បានធានាការរុលចូលទៅក្នុងតំបន់ដាហ្វឺ និងគ័រដូហ្វាន( Kordofan)។

លោក Ahmed Abdallah មានវ័យ៥១ ឆ្នាំនៅទីក្រុង Omdurman ជាទីក្រុងដែលនៅជាប់នឹងទីក្រុងខាទុំ ជាកន្លែងដែលគូប្រជែង កំពុងវាយប្រហារលើមូលដ្ឋានទ័ព បាននិយាយថា៖ «ពួកគេ កំពុងបាញ់កាំភ្លើងធំយ៉ាងខ្លាំងក្លា ហើយជារឿយៗ វាធ្លាក់ចំផ្ទះរបស់ជនស៊ីវិល»។