ប្រជាពលរដ្ឋរស់នៅក្នុងទីក្រុងតេអេរ៉ង់ ប្រទេសអ៊ីរ៉ង់ បាននាំគ្នាត្អូញត្អែពីការកើនឡើងខ្យល់កខ្វក់នៅក្នុងទីក្រុងមួយនេះ ខណៈដែលសាលារៀនត្រូវបានផ្អាកការសិក្សាបណ្តោះអាសន្ន ។ 

លោក Shahriar Karami គឺជាពលរដ្ឋមួយរូបរស់នៅក្នុងទីក្រុងតេអេរ៉ង់ និយាយថា ខ្យល់កខ្វក់ បានក្លាយជាបញ្ហាសម្រាប់អ្នករាល់គ្នា គឺជាបញ្ហាដ៏ធ្ងន់ធ្ងរមួយដែលកាន់តែអាក្រក់ទៅជារៀងរាល់ថ្ងៃ ហើយក្រុមអាជ្ញាធរ បានបិទសាលារៀនអស់រយៈពេល ២ថ្ងៃមកហើយ ។

 លោកថាការពិតមួយដែលត្រូវដាក់ការស្តីបន្ទោសគឺក្រុមអាជ្ញាធរ ដែលពុំបានគិតគូរដល់ប្រជាពលរដ្ឋរបស់ពួកគេ ។ លោកបន្តថា ពួកគេគួរតែជំនួសរថយន្តចាស់ដោយរថយន្តថ្មី ធ្វើបច្ចុប្បន្នភាពមធ្យោបាយដឹកជញ្ជូនសាធារណៈ ទាំងនេះគឺជាអ្វីដែលអ្នកគ្រប់គ្រង និងអ្នកដែលទទួលខុសត្រូវ អាចធ្វើបាន ប៉ុន្តែជាក់ស្តែងពួកគេពុំបានធ្វើវាឡើយ ។

 ដងផ្លូវ និងអគារនៅក្នុងរដ្ឋធានីតេអេរ៉ង់ គ្រប់ដណ្តប់ដោយផ្សែងអ័ព្ទពុល ហើយសន្ទស្សន៍គុណភាពខ្យល់ (AQI)បានរកឃើញគុណភាពខ្យល់លើសពីកម្រិត ១៥០ នៅតាមតំបន់ជាច្រើនក្នុងទីក្រុង ធ្វើឲ្យខ្យល់ស្ថិតក្នុងកម្រិតគ្មានសុខភាព ។ 

សូមបញ្ជាក់ថា គុណភាពខ្យល់កខ្វក់លើសពីកម្រិត ៦០ ត្រូវបានគេចាត់ទុកថាជាខ្យល់គ្មានសុខភាព ៕