យោធាចិន នៅថ្ងៃពុធ (ទី៦ ខែធ្នូ) បាននិយាយថា ខ្លួនបានបញ្ជូនយន្តហោះចម្បាំងទៅត្រួតពិនិត្យ និងព្រមានយន្តហោះល្បាតរបស់កងទ័ពជើងទឹកសហរដ្ឋអាមេរិក ដែលបានហោះពីលើច្រកសមុទ្រតៃវ៉ាន់ដ៏រសើប ជាបេសកកម្មដែលបានធ្វើឡើងប៉ុន្មានសប្តាហ៍ មុនកោះតៃវ៉ាន់រៀបចំការបោះឆ្នោត។

ប្រទេសចិនអះអាងអធិបតេយ្យភាពលើកោះតៃវ៉ាន់ ដែលគ្រប់គ្រងតាមបែបប្រជាធិបតេយ្យ ហើយនិយាយថា ខ្លួនមានយុត្តាធិការលើច្រកសមុទ្រនេះ។ កោះតៃវ៉ាន់ និងសហរដ្ឋអាមេរិក ជំទាស់តវ៉ានឹងការអះអាងនោះ ដោយនិយាយថា ច្រកសមុទ្រតៃវ៉ាន់ ជាផ្លូវទឹកអន្តរជាតិ។

កងនាវាចរទី៧ របស់កងទ័ពជើងទឹកសហរដ្ឋអាមេរិក បាននិយាយថា យន្តហោះល្បាតដែនសមុទ្រ P-8A Poseidon និងឈ្លបយកការណ៍ ដែលក៏ត្រូវបានប្រើសម្រាប់បេសកកម្មប្រឆាំងនាវាមុជទឹកផងដែរនោះ បានហោះពីលើច្រកសមុទ្រក្នុងដែនអាកាសអន្តរជាតិ។

កងទ័ពជើងទឹករបស់អាមេរិកបានឲ្យដឹងនៅក្នុងសេចក្តីថ្លែងការណ៍ថា៖ «ការឆ្លងកាត់របស់យន្តហោះលើច្រកសមុទ្រតៃវ៉ាន់បង្ហាញពីការប្តេជ្ញាចិត្តរបស់សហរដ្ឋអាមេរិក ចំពោះតំបន់ឥណ្ឌូប៉ាស៊ីហ្វិក ដែលសេរី និងបើកចំហ។ យោធាសហរដ្ឋអាមេរិកហោះហើរ ធ្វើនាវាចរណ៍ និងប្រតិបត្តិការ នៅគ្រប់ទីកន្លែង ដែលច្បាប់អន្តរជាតិអនុញ្ញាត»។

ចំណែកយោធាចិន បានពណ៌នាការហោះហើរនេះថា ជា «ការឃោសនាបំផ្លើសសាធារណៈ» ដោយបន្ថែមថា ខ្លួនបានបញ្ជូនយន្តហោះចម្បាំងទៅត្រួតពិនិត្យ និងព្រមានយន្តហោះអាមេរិក ហើយនិង «ដោះស្រាយបញ្ហានេះ ដោយអនុលោមតាមច្បាប់ និងបទប្បញ្ញត្តិ»៕