នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃអង្គារ (ទី៥ ខែធ្នូ) បាននិយាយថាលោកបានឮរឿងរ៉ាវនៃការរំលោភបំពានផ្លូវភេទ ពេលជួបជាមួយចំណាប់ថ្នូរ ដែលត្រូវបានក្រុមហាម៉ាសបញ្ជូនមកវិញ ក្នុងអំឡុងពេលផ្អាកការប្រយុទ្ធគ្នា នៅតំបន់ហ្កាហ្សា នាពេលថ្មីៗនេះ ហើយបានអំពាវនាវឲ្យអង្គការស្ត្រី និងសិទ្ធិមនុស្សចាត់វិធានការលើបញ្ហានោះ ដោយបានបញ្ជាក់ថា លោកមិនបានឮពីការខឹងសម្បារបស់ពួកគេនោះទេ។

ជាមួយគ្នានេះ លោក Netanyahu បានប្រាប់ថា ប្រតិបត្តិការផ្លូវគោក បានពង្រីកទៅភាគខាងត្បូងនៃតំបន់ហ្កាហ្សា ហើយលោកបាននិយាយថា «គ្មានកន្លែងណាហួសពីលទ្ធភាពរបស់យើងទេ»។

នៅឯសន្និសីទសារព័ត៌មាន ហើយនៅពេលត្រូវបានសួរអំពីអំពើហិង្សារបស់អ្នកតាំងទីលំនៅ នៅតំបន់វ៉េសប៊ែង រដ្ឋមន្ត្រីការពារជាតិអ៊ីស្រាអែល លោក Yoav Gallant បានថ្កោលទោសអំពើហិង្សានោះ ដោយនិយាយថា តាមច្បាប់រដ្ឋ មានតែនគរបាល និងយោធាប៉ុណ្ណោះ ដែលមានសិទ្ធិប្រើប្រាស់កម្លាំង៕