កាយវប្បកម្ម៖ ក្រុមជម្រើសជាតិកីឡាកាយវប្បកម្ម ៤រូបក្រោមការដឹកនាំរបស់គ្រូបង្វឹកលោក ចាប វ៉ាននី បាននឹងកំពុងខិតខំប្រឹងប្រែងហ្វឹកហាត់ ដើម្បីត្រៀមខ្លួនចូលរួមការប្រកួតកីឡាស៊ីហ្គេមឆ្នាំ២០២១ នៅរដ្ឋធានីហាណូយ ដែលកំពុងស្ថិតក្នុងភាពស្រពេចស្រពិលក្នុងការរៀបចំនៅឡើយ បន្ទាប់ពីម្ចាស់ផ្ទះវៀតណាមមានបំណងចង់ពន្យារពេលទៅឆ្នាំក្រោយ។
លោក សុខ វណ្ណៈ អគ្គលេខាធិការនៃសហព័ន្ធកីឡាកាយវប្បកម្មកម្ពុជាបានឲ្យដឹងថា ទោះបីស៊ីហ្គេមនៅវៀតណាមមិនទាន់ច្បាស់អំពីកាលបរិច្ឆេទប្រកួត ១០០% ក្ដី ក៏កីឡាករជម្រើសជាតិរបស់ខ្លួនមិនបោះបង់ការខិតខំប្រឹងប្រែងដែរ ដោយពួកគេបានព្យាយាមហ្វឹកហាត់ជានិច្ច ដើម្បីត្រៀមចូលរួមការប្រកួតព្រឹត្តិការណ៍ដ៏ធំប្រចាំតំបន់នេះ។ លោកបន្ដថា ក្នុងចំណោមកីឡាករជម្រើសជាតិទាំង ៤រូបគឺមានកីឡាករ ២រូបមានក្លិបរៀងខ្លួននៅខណ្ឌទួលគោកមួយ និងខណ្ឌច្បារអំពៅមួយ ហើយ ២នាក់ទៀតហាត់នៅក្លិបផ្សារសំណង់១២។ ប៉ុន្តែរៀងរាល់ចុងសប្ដាហ៍ កីឡាករទាំងអស់ត្រូវបានណាត់ជួបគ្នាហាត់នៅក្លិបផ្សារសំណង់១២ ដើម្បីកែលម្អចំណុចខ្វះខាត និងពង្រឹងការហ្វឹកហាត់កាន់តែល្អប្រសើរ។
អគ្គលេខាធិការបានបន្ថែមថា ក្រោយឆ្លងកាត់ការប្រមូលផ្ដុំ និងហ្វឹកហាត់រយៈពេល ២ខែកន្លះមកនេះ សហព័ន្ធសង្កេតឃើញកីឡាករទាំងអស់ មានការខិតខំប្រឹងប្រែង មានកាយសម្បទារីកចម្រើនច្រើន ហើយលោកសង្ឃឹមថា ការខិតខំប្រឹងនេះនឹងជំរុញឲ្យពួកគេមានលទ្ធភាពគ្រប់គ្រាន់ ក្នុងការប្រកួតប្រជែងដណ្ដើមមេដាយជូនជាតិ ក្នុងការប្រកួតកីឡាស៊ីហ្គេមឆ្នាំ២០២១ នៅវៀតណាម។ គួរបញ្ជាក់ថា កីឡាករកាយវប្បកម្មជម្រើសជាតិកម្ពុជា ដែលកំពុងប្រមូលផ្ដុំហ្វឹកហាត់ក្រោមការឧបត្ថម្ភរបស់ក្រសួងអប់រំ យុវជន និងកីឡា រួមមានកីឡាករ កែវ សំណាង, ទ្រីង ចាន់, អ៊ុន បូរ៉ាត់ និងកីឡាករ អ៊ុត សុធា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
