ក្រុមអាជ្ញាធរបាននិយាយថា ការបាញ់ប្រហារនៅបរិវេណសំខាន់នៃសាកលវិទ្យាល័យ Nevada ក្នុងទីក្រុង Las Vegas កាលពីថ្ងៃពុធ បានបណ្តាលឲ្យមនុស្សយ៉ាងហោចណាស់ ៣ នាក់ស្លាប់ មុន​ពេលការបង្ហូរឈាមបានបញ្ចប់ ដោយការស្លាប់ជនសង្ស័យ។ 

ស្នងការនគរបាលក្រុង Las Vegas បាននិយាយ​នៅ​ក្នុង​សេចក្តី​ថ្លែង​ការណ៍​ជា​លាយ​លក្ខណ៍​អក្សរ​នៅ​លើប្រព័ន្ធផ្សព្វផ្សាយសង្គមថា មនុស្ស ៣នាក់ មិនរាប់បញ្ចូលទាំង​ក្មាន់​បាញ់​ប្រហារ​បានស្លាប់។ មនុស្សម្នាក់ទៀតដែលត្រូវគេបាញ់នោះស្ថិតក្នុងស្ថានភាពធ្ងន់ធ្ងរ។ 

ក្រុមអាជ្ញាធរពុំបាន​កំណត់អត្តសញ្ញាណជនរងគ្រោះឡើយ ។ គេក៏នៅមិនទាន់ដឹងថា តើ​ជន​សង្ស័យ​ត្រូវ​នគរបាលបាញ់សម្លាប់ ឬធ្វើអត្តឃាតខ្លួនឯងនៅឡើយទេ ។

លោក វីនសេនធ៍ ផេរ៉េស (Vincent Perez) សាស្ត្រាចារ្យនៅសាកលវិទ្យាល័យ ដែល​ត្រូវ​គេ​ស្គាល់​ជា​អក្សរកាត់ថា UNLV បានប្រាប់សារព័ត៌មាន MSNBC តាមទូរស័ព្ទ​ថា​លោក​បាន​ឮ​ស្នូរ​កាំភ្លើង​ជា​ច្រើនគ្រាប់មុនពេលចូលបរិវេណសាលា។ ព័ត៌មានលម្អិតផ្លូវការនៃឧបទ្ទវហេតុនេះ នៅ​តែ​មិន​ច្បាស់នៅឡើយ។

អ្នកនាំពាក្យនគរបាលនៅសាកលវិទ្យាល័យនេះលោក អាដាំ ហ្គាស៊ីយ៉ា (Adam Garcia) បាន​និយាយ​នៅ​ក្នុងសន្និសីទសារព័ត៌មានថា បន្ទាប់ពី​ទទួល​បាន​ការ​ហៅ​ទូរស័ព្ទ​រាយការណ៍​ពី​ក្មាន់​បាញ់​ប្រហារ​សកម្មនៅក្នុងបរិវេណសាលកវិទ្យាល័យនោះ មន្ត្រីអនុវត្តច្បាប់ បានឆ្លើយតបភ្លាមៗ ជា​មួយជនសង្ស័យ ។ លោកបានបន្ថែមថា ជនសង្ស័យបានស្លាប់ហើយ។

ស្នង​ការនគរបាលលោកឃេវិន ម៉ាក់ ម៉ាហីល (Kevin McMahill)នៃស្នងការដ្ឋាននគរបាល ទីក្រុង Las Vegas បាននិយាយថា ពុំមានការគំរាមកំហែងណាមួយចំពោះសហគមន៍ទៀតទេ ប៉ុន្តែ​សាកលវិទ្យាល័យ UNLV សំខាន់ និងសាខាផ្សេងទៀតនៃសាកលវិទ្យាល័យនេះ កំពុង​ត្រូវ​បាន​បិទ​នៅ​ថ្ងៃ​កើត​ហេតុនោះ ជាការបន្ថែមការប្រុងប្រយ័ត្ន៕