រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី ជែនណេត យ៉េឡែន (Janet Yellen) កាល​ពីថ្ងៃពុធ (០៦ ធ្នូ) បានប្រកាសដាក់ទណ្ឌកម្មថ្មីប្រឆាំងនឹងបុគ្គលចំនួន ១៥នាក់ និង​ក្រុមហ៊ុន​ម៉ិកស៊ិក​ចំនួន២ ដែលមានទំនាក់ទំនងជាមួយក្រុមជួញដូរគ្រឿងញៀន ប៊ែលត្រាន ឡេយវ៉ា (Beltran Leyva) ខណៈលោក​ស្រីព្យាយាម​ធ្វើ​ឱ្យ​ប្រសើរ​ឡើង​នូវ​កិច្ច​សហប្រតិបត្តិការ​ជា​មួយ​ម៉ិកស៊ិក ក្នុង​ការ​បញ្ឈប់​លំហូរ​នៃ​សារធាតុ​អាភៀន​ហ្វង់តានីល​ដ៏​គ្រោះថ្នា​ក់​ទៅ​កាន់​សហរដ្ឋ​អាមេរិក​។

លោកស្រី យ៉េឡែន បានបង្ហាញ​ការ​ដាក់​ទណ្ឌកម្ម​នោះ​ក្នុង​ការ​ធ្វើ​ដំណើរ​ទស្សនកិច្ច​លើក​ដំបូង​របស់​ខ្លួន​ទៅកាន់ប្រទេសម៉ិកស៊ិក ចាប់តាំងពីចូលកាន់តំណែងក្នុងឆ្នាំ២០២១ មក។ ទណ្ឌ​កម្ម​ទាំង​នោះ​មាន​គោលបំណងរំខានដល់អង្គការ ប៊ែលត្រាន ឡេយវ៉ា ដែលក្រសួង​រតនាគារ​ពិពណ៌នា​ថា​ជា «អង្គការជួញដូរគ្រឿងញៀនដ៏មានឥទ្ធិពលបំផុតមួយនៅក្នុងពិភពលោក» និង​ជា​អ្នក​ផ្គត់​ផ្គង់​ដ៏​សំខាន់​នៃគ្រឿងញៀនកូកាអ៊ីន និងហ្វង់តានីល ទៅសហរដ្ឋអាមេរិក។

ក្រសួងរតនាគារ​ធ្លាប់បានដាក់ទណ្ឌកម្មលើសមាជិកក្រុមជួញដូរគ្រឿងញៀននេះពីមុន ប៉ុន្តែ​ទណ្ឌកម្មចុងក្រោយបង្អស់នេះត្រូវបានដាក់ចេញក្រោមបញ្ជាប្រតិបត្តិឆ្នាំ២០២១ ដែល​ពង្រីក​វិសាលភាព​នៃ​សកម្មភាពទប់ស្កាត់ពាក់ព័ន្ធនឹងគ្រឿងញៀន ដើម្បីរួមបញ្ចូល​ប្រតិបត្តិការ​ជួញ​ដូរ​ដែល​បាន «ចូលរួមចំណែក ឬបង្កហានិភ័យយ៉ាងខ្លាំងក្នុងការរួមចំណែក» នៃការរីករាល​ដាល​គ្រឿង​ញៀន​ខុសច្បាប់។

លោកស្រី យ៉េឡែន បានទស្សនាមន្ទីរពិសោធន៍ឧក្រិដ្ឋកម្មរបស់រដ្ឋាភិបាលម៉ិកស៊ិក ដែល​កំពុង​បណ្តុះ​បណ្តាល​សត្វសុខនដើម្បីរកមើលសារធាតុគីមីនៃសារធាតុហ្វង់តានីល។ លោកស្រី​នឹ​ង​ជួប​ជាមួយ​រដ្ឋមន្ត្រីហិរញ្ញវត្ថុ និងប្រធានធនាគារកណ្តាលរបស់ប្រទេសម៉ិកស៊ិក ដើម្បី​ពិភាក្សា​អំពី​វិធី​កែ​លម្អ​ការចែករំលែកព័ត៌មានអំពីការជួញដូរខុសច្បាប់ទាំងនោះ៕