បុគ្គលិកមកពីអង្គការក្រៅរដ្ឋាភិបាល គ្រូពេទ្យគ្មានព្រំដែន ដែលមានមូលដ្ឋាននៅទីក្រុងប៉ារីស បាន​រៀបចំពិធីរំលឹកមួយនៅខាងក្រៅអង្គការសហប្រជាជាតិក្នុងទីក្រុងញូវយ៉កកាលពីថ្ងៃពុធ ដោយ​គោរពដល់បុគ្គលិករួមការងារដែលត្រូវបានសម្លាប់នៅហ្កាហ្សា។

លោកវេជ្ជ​បណ្ឌិត អាវរីល បែនណយ(Avril Benoît) នាយកប្រតិបត្តិ នៃ​អង្គការ​គ្រូ​ពេទ្យ​គ្មាន​ព្រំដែន​បាន​និយាយថា យើងត្រូវការបទឈប់បាញ់ប្រកបដោយនិរន្តរភាព ព្រោះជា​រៀងរាល់ថ្ងៃ​ការ​ហ៊ុមព័ទ្ធ និងអំពើហឹង្សា នៅតែបន្តក្នុងតំបន់ហ្កាហ្សា ដែលការ​តស៊ូ​ដើម្បី​រស់​រាន​មាន​ជីវិត​កាន់​តែ​អស់​សង្ឃឹម។

កុមារដែលរងរបួស រួមទាំងកុមារតូចៗដែលទើបចេះដើរ មានពាសពេញនៅមន្ទីរពេទ្យ Nasser តំបន់​ហ្កាហ្សាកាលពីថ្ងៃពុធ បន្ទាប់ពីការវាយប្រហារតាមអាកាសរបស់អ៊ីស្រាអែល បានធ្លាក់​ទៅ​លើ​តំបន់​លំនៅឋានមួយកន្លែងនៅទីក្រុង Khan Younis ភាគកណ្តាល។ កាលពីព្រឹកថ្ងៃពុធ កង​កម្លាំងអ៊ីស្រាអែល បានចូលទៅដល់បេះដូងទីក្រុង Khan Younis ដោយ​បង្ខំ​ឱ្យជន​ស៊ីវិល​ប៉ាឡេស្ទីន ស្វែងរកទីជ្រកកោននៅកន្លែងផ្សេង ខណៈចំនួនតំបន់សុវត្ថិភាពពុំមានច្រើននោះទេ។

យន្តហោះចម្បាំងរបស់អ៊ីស្រាអែល បាន​ទម្លាក់​គ្រាប់​បែក​លើ​គោល​ដៅ​នានា​នៅ​ទូទាំង​តំបន់​ឆ្នេរ​ដែល​មាន​ប្រជាជនរស់ច្រើន នៅក្នុងដំណាក់កាលមួយនៃការប្រយុទ្ធខ្លាំងបំផុតក្នុងរយៈពេលពីរខែ ចាប់​តាំងពីអ៊ីស្រាអែល បាន​ចាប់​ផ្តើម​យុទ្ធនាការ​យោធា​របស់​ខ្លួន​ដើម្បី​កម្ទេច​ក្រុម​សកម្ម​ប្រយុទ្ធ​ប៉ាឡេស្ទីន​។

ក្រុមគ្រូពេទ្យបឋមប៉ាឡេស្ទីន បាននិយាយថា មន្ទីរពេទ្យកំពុងពេញហៀរទៅដោយអ្នកស្លាប់ និង​អ្នករបួស ភាគច្រើនជាស្ត្រី និងកុមារ ហើយការផ្គត់ផ្គង់ផ្សេងៗបានអស់។ ជន​ភៀស​ខ្លួន​រាប់​សែន​នាក់ ដែលត្រូវបានជំរុញឲ្យចាកចេញពីភាគខាងជើង កំពុង​ស្វែង​រក​ទីជម្រក​នៅ​ភាគ​ខាង​ត្បូង​ដែល​កំណត់​ថាជាតំបន់សុវត្ថិភាពដោយអ៊ីស្រាអែល។