​បាល់ទាត់៖ ​ខ្សែបម្រើ​ក្រុម​ជំរើស​ជាតិ​ដា​ណឺ​ម៉ាក ​បាន​សរសេរ​សារ​លើ​បណ្ដាញ​សង្គម​លើកដំបូង​ពី​មន្ទីរពេទ្យ អរគុណ​ដល់​អ្នកគាំទ្រ និង​មនុស្ស​រាល់គ្នា​ជុំវិញ​ពិភពលោក​ចំពោះ​ពាក្យ​ជូនពរ​ និង​លើកទឹកចិត្ត បន្ទាប់ពី​គាំងបេះដូង​ដួល​សន្លប់​អំឡុង​ការប្រកួត Euro ២០២០ ដែល​ដា​ណឺ​ម៉ាក​ចាញ់​ហ្វាំ​ង​ឡង់ ១-០​។

​​កីឡាករ​របស់ Inter Milan រូប​នេះ​កំពុង​សម្រាក​ព្យាបាល​នៅក្នុង​មន្ទីរពេទ្យ​នៅឡើយ និង​ស្ថិត​ក្នុង​ការ​តាម​ដាន​យ៉ាង​យកចិត្ត​ទុក​ដោយ​ពី​ក្រុម​គ្រូពេទ្យ​។ ​Eriksen បាន​អោយ​ដឹង​ក្នុង​សារ​របស់​ខ្លួន​ថា វា​ជា​រឿង​គួរ​អោយ​រំភើប​មួយ និង​មានន័យ​បំផុត​សំរាប់​រូបគេ​ និង​ក្រុម​គ្រួសារ​។ អាការៈ​របស់​គេ​នៅ​ពេល​នេះ​បាន​ល្អ​ប្រសើរ​ច្រើន និង​រង់ចាំ​តាមដាន​មិត្ត​រួម​ក្រុម​ដា​ណឺ​ម៉ាក​ប្រកួត​បន្ត​ទៀត​។ រំលឹក​ថា ហេតុការណ៍​របស់ Eriksen បាន​ធ្វើ​អោយ​ពិភព​បាល់ទាត់​ទូទាំង​ពិភពលោក​មានការ​តក់​ស្លុត និង​បួ​ក​សួង​អោយ Eriksen រួច​ផុត​ពី​គ្រោះថ្នាក់​។

​​កីឡាករ​ដែល​បាន​ស៊ុត​បញ្ចូល​ទី​នៅ Euro ២០២០ ចុង​សប្ដាហ៍​កន្លងទៅ​មួយ​ចំនួន​មិនបាន​អបអរ​គ្រាប់​បាល់​របស់​ខ្លួន​ឡើយ និង​យក​ការ​អបអរ​នោះ​ទៅជា​ការ​ឧទ្ទិស និង​លើកទឹកចិត្ត​ដល់ Eriksen ដូចជា​អ្នក​ស៊ុត​បញ្ចូល​ទី​អោយ​ហ្វាំ​ង​ឡង់ Pohjanpalo, Romelu Lukaku របស់​ប៊ែ​ល​ហ្ស៊ិ​ក និង​គ្រាប់​របស់ Lainer ស៊ុត​នាំមុខ​អោយ​អូទ្រីស​លើ​ម៉ា​សេ​ដ្វា​ន់​ខាងជើង​យប់មិញ​ជាដើម​៕

​អត្ថបទ​៖​នាង សុភា​វុ​ធ