ភ្នំពេញ៖ លោកសន្ដិបណ្ឌិត នេត សាវឿន ឧបនាយករដ្ឋមន្ដ្រី និងជា​ប្រធាន​អាជ្ញាធរជាតិ​ប្រយុទ្ធ​ប្រឆាំង​គ្រឿងញៀន បានធ្វើការក្រើនរំលឹកជាថ្មី ដល់មន្ដ្រីទាំងអស់របស់អគ្គលេខាធិការដ្ឋាន នៃ​អាជ្ញាធរជាតិ​ប្រយុទ្ធប្រឆាំងគ្រឿងញៀន ត្រូវបង្កើនការសិក្សា ស្រាវជ្រាវ ណែនាំដល់​អាជ្ញាធរ​ថ្នាក់​ក្រោម​ជាតិ និងដឹកនាំអនុវត្តការងារអនុវត្តច្បាប់ និងផ្សព្វផ្សាយអប់រំ ដើម្បីប្រយុទ្ធ​ប្រឆាំង​គ្រឿង​ញៀន​។

ក្នុងឱកាសអញ្ជើញជាធិបតីភាពពិធីសំណេះសំណាល ជាមួយថ្នាក់ដឹកនាំ និងមន្ដ្រីគ្រប់ជាន់ថ្នាក់ នៃ​អគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន នៅព្រឹកថ្ងៃទី៧ ខែធ្នូ ឆ្នាំ២០២៣​នេះ ឯកឧត្តម នេត សាវឿន បានប្រៀប​ការ​ប្រយុទ្ធ​ប្រឆាំង​បទ​ល្មើស​គ្រឿង​ញៀន​នៅ​ក្នុង​ប្រទេស​កម្ពុជា ដូចគ្នាទៅនឹងការប្រយុទ្ធក្នុងសមរភូមិសង្គ្រាមយ៉ាងដូច្នេះដែរ។ ឯកឧត្តម​បាន​ផ្ដល់អា​ទិភាព​ខ្ពស់​លើ​ការងារផ្សព្វផ្សាយអប់រំទៅកាន់គ្រប់មជ្ឈដ្ឋានទាំងអស់ ដែលជាចំណែកមួយដ៏សំខាន់ ក្នុង​ការ​ប្រយុទ្ធ​ប្រឆាំងគ្រឿងញៀនឲ្យមានប្រសិទ្ធភាពខ្ពស់ ស្រប​តាម​គោល​នយោបាយ​របស់​រាជ​រដ្ឋាភិបាល​កម្ពុជា​។

ឯកឧត្តមបញ្ជាក់ថា ការផ្សព្វផ្សាយឲ្យប្រជាពលរដ្ឋបានយល់ដឹងអំពីផលប៉ះពាល់ នៃគ្រឿងញៀន និង​ល្បិចកលរបស់ឧក្រិដ្ឋជន ត្រូវកែទម្រង់យន្ដការផ្សព្វផ្សាយអប់រំមួយចំនួន ដែល​មិន​ទាន់​មាន​ប្រសិទ្ធ​ខ្ពស់ ដោយត្រូវប្រើប្រាស់នូវយន្ដការថ្មីៗ ធ្វើបែបណាឲ្យមហាជនទូទៅឆាប់ចាប់អារម្មណ៍ ពិសេស​ក្នុងចង្កោមយុវជន ដែលជាមុខសញ្ញាងាយរងគ្រោះថ្នាក់។

ឯកឧត្តមថ្លែងថា៖«ខ្ញុំឃើញអាទិភាពទី១ កិច្ចការផ្សព្វផ្សាយអប់រំ យើងលើក​នេះ​យក​ការ​ផ្សព្វ​ផ្សាយ​អប់រំទី១ សំខាន់ណាស់ដើម្បីឲ្យប្រជាពលរដ្ឋយើងយល់ដឹង ដូច្នេះសូមរួមសហការគ្នា។ ពាក្យ​ផ្សព្វផ្សាយអប់រំនេះ សូមធ្វើការកែទម្រង់ធ្វើយ៉ាងណាអប់រំឲ្យមានគុណភាព។ អគ្គ​លេខា​ធិការដ្ឋាន នាយកដ្ឋានជំនាញ សិក្សាអំពីផែនការ ខ្លឹមសារ របៀប និងវិធីសាស្ដ្រ ហើយ​ត្រូវ​រក​អ្វី​ដែល​ថ្មី រកអ្វីដែលពេញនិយមងាយស្រួលប្រជាពលរដ្ឋតាមដាន»។

ឯកឧត្តម នេត សាវឿន ជំនួសមុខឲ្យសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី​នៃ​កម្ពុជា​ បានបង្ហាញនូវការជឿជាក់លើសមត្ថភាព របស់មន្ដ្រីនៃអាជ្ញាធរជាតិ​ប្រយុទ្ធ​ប្រឆាំង​គ្រឿង​ញៀន​ទាំង​អស់ ហើយត្រូវរួមគ្នាក្នុងការអនុវត្តតួនាទី ភារកិច្ចរបស់ខ្លួនឲ្យកាន់តែមានប្រសិទ្ធភាព ដើម្បី​ចូលរួមចំណែកសម្រេចឲ្យបាននូវការប្ដេជ្ញាចិត្តរបស់រាជរដ្ឋាភិបាលកម្ពុជា នីតិកាល​ទី៧​នេះ​៕