ភ្នំពេញ ៖សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រកម្ពុជា មានប្រសាសន៍ទាក់ទងនឹងបញ្ហាសេដ្ឋកិច្ច មានបញ្ហាពីរដែលកម្ពុជាកំពុងបន្តយកចិត្តទុកដាក់ ក្នុងនោះទី១ បញ្ហាសន្តិសុខស្បៀង ទី២ បញ្ហាសន្តិសុខថាមពល។ 

សម្ដេសតេជោ ហ៊ុន សែន បានមានប្រសាសន៍បែបនេះ ក្នុងឱកាស អនុញ្ញាតឱ្យ ឯកឧត្តម ចច យ៉ូ យ៉ុង ប៊ូន (George Yeo Yong-Boon) អតីតរដ្ឋមន្ត្រីការបរទេសសិង្ហបុរី ចូលជួបសម្ដែងការគួរសម និងពិភាក្សាការងារ នៅវិមាន៧មករា រាជធានីភ្នំពេញនៅថ្ងៃទី៧ ខែធ្នូ ឆ្នាំ២០២៣។ 

ក្នុងឱកាសនោះសម្ដេចតេជោ ហ៊ុន សែន បានសម្ដែងក្ដីរីករាយដែលបានជួបជាមួយ ឯកឧត្តម ចច យ៉ូ យ៉ុង ប៊ូន និងចូលរួមអបអរសាទរ ចំពោះការផ្សព្វផ្សាយសៀវភៅរបស់ឯកឧត្តម ហើយសម្ដេចបានចាត់ទុកការរៀបចំសៀវភៅសម្រាប់អ្នកជំនាន់ក្រោយនេះ ជាការល្អប្រសើរណាស់។ 

សម្ដេចតេជោក៏បានរៀបរាប់អំពីការរៀបចំគ្រប់បែបយ៉ាងសម្រាប់អ្នកជំនាន់ក្រោយ ជាពិសេស សម្ដេចតេជោ បានជម្រាបថា នៅពេលដែល ឯកឧត្តម បានអញ្ជើញមកដល់ទីស្នាក់ការកណ្ដាលគណបក្សប្រជាជនកម្ពុជា ឯកឧត្តមបានឃើញពីការរៀបចំទីស្នាក់ការកណ្ដាល ហើយក៏មានការរៀបចំសាខាគណបក្ស នៅតាមបណ្ដារាជធានី-ខេត្ត ក្រុង ស្រុក ខណ្ឌ ឃុំ-សង្កាត់ ដែលនេះជាការរៀបចំទុកយូរអង្វែង។

ឯកឧត្តម ចច យ៉ូ យ៉ុង ប៊ូន មានប្រសាសន៍ដោយសេចក្ដីរីករាយដែលបានជួប សម្ដេចតេជោម្ដងទៀត ដោយសម្ដេច បានផ្ដល់ឱកាស ផ្ដល់ពេលវេលាឱ្យឯកឧត្តម បានជួបសំណេះសំណាលដោយផ្ទាល់នៅពេលនេះ។ ឯកឧត្តម ចច យ៉ូ យ៉ុង ប៊ូន មានប្រសាសន៍បន្តថា ឯកឧត្តម បានចូលនិវត្តន៍ពីការងារហើយ ហើយបានមកកម្ពុជាម្ដងទៀតនេះ បន្ទាប់ពីធ្លាប់នសមមកកាន់ព្រះរាជាណាចក្រកម្ពុជាម្ដង កាលពីឆ្នាំ១៩៩៩ ដែលកាលនោះ ឯកឧត្តម ចម ប្រសិទ្ធ ជាអ្នកជូនដំណើរ ឯកឧត្តមទៅលេងខេត្តសៀមរាប ហើយការមក ទស្សនកិច្ចនៅកម្ពុជាលើកនេះ ឯកឧត្តមក៏បានទៅកម្សាន្តនៅខេត្តសៀមរាបផងដែរ ដោយបានឃើញព្រះអាទិត្យរៀបលិច មានពណ៌មាស ស្រស់ស្អាតណាស់លើប្រាសាទអង្គរវត្ត។ 

ឯកឧត្តមបានលើកឡើងទៀតថា រាជធានីភ្នំពេញ ក៏រៀបចំបានល្អ មានប្រជាជនធ្វើចរាចរច្រើន មានអាគារថ្មីៗ ខ្ពស់ៗ ហើយប្រជាជនរស់នៅប្រកបដោយស្មារតីរីករាយ ក្រោមការអភិវឌ្ឍន៍ប្រកបដោយសុខសន្តិភាព។

ទាក់ទងនឹងបញ្ហាសេដ្ឋកិច្ច សម្ដេចតេជោមានប្រសាសន៍ថា មានបញ្ហាពីរដែលកម្ពុជាកំពុងបន្តយកចិត្តទុកដាក់ ៖ទី១) បញ្ហាសន្តិសុខស្បៀង ទី២) បញ្ហាសន្តិសុខថាមពល។ សម្ដេចតេជោបញ្ជាក់ថា ពាក់ព័ន្ធបញ្ហាសន្តិសុខស្បៀង គឺកម្ពុជាបានប្រែក្លាយជាប្រទេសផលិតស្បៀងសម្រាប់ផ្គត់ផ្គង់ខ្លួនឯង សម្រាប់បរិភោគ និងទៅជាប្រទេសដែលនៅសល់ស្បៀងសម្រាប់ការនាំចេញមួយចំនួន។ ពាក់ព័ន្ធនឹងសន្តិសុខថាមពល ទោះបីជាកម្ពុជាមិនមែនជាប្រទេសផលិតប្រេង ប៉ុន្តែកម្ពុជានៅគ្រប់គ្រងបាន ដោយគិតមកដល់ពេលនេះកម្ពុជាបានប្រើប្រាស់ថាមពលកកើតឡើងវិញប្រមាណ ៦២% ហើយបានឈប់ផលិតថាមពលពីធ្យូងថ្ម៕ ដោយ ៖ ដារា