ប្រភពចំនួន២ ដែលដឹងពីគោលបំណងរបស់អារ៉ាប៊ីសាអូឌីត បាននិយាយថា ប្រទេសអារ៉ាប៊ីសាអ៊ូឌីតបានស្នើឲ្យសហរដ្ឋអាមេរិកបង្ហាញការអត់ធ្មត់ ក្នុងការឆ្លើយតបចំពោះការវាយប្រហារដោយក្រុមហូធីរបស់យេម៉ែន ប្រឆាំងនឹងកប៉ាល់នៅក្នុងសមុទ្រក្រហម ខណៈដែលទីក្រុងរីយ៉ាដ ស្វែងរកការទប់ស្កាត់ការរាលដាលនៃសង្គ្រាមរវាងក្រុមហាម៉ាស និងអ៊ីស្រាអែល។

ក្រុមហូធី ដែលមានសម្ព័ន្ធភាពជាមួយអ៊ីរ៉ង់ បានចូលខ្លួនទៅក្នុងជម្លោះ ដែលបានរីករាលដាល នៅជុំវិញតំបន់មជ្ឈិមបូព៌ា ចាប់តាំងពីសង្រ្គាមនោះ បានផ្ទុះឡើងកាលពីថ្ងៃទី៧ ខែតុលា ដោយបានវាយប្រហារលើនាវានានា នៅក្នុងផ្លូវដឹកជញ្ជូនសំខាន់ៗ និងការបាញ់យានដ្រូន និងមីស៊ីលទៅកាន់ប្រទេសអ៊ីស្រាអែល។

ក្រុមដែលគ្រប់គ្រងទឹកដីយេម៉ែនភាគច្រើន និយាយថា ការវាយប្រហាររបស់ខ្លួន គឺជាការបង្ហាញពីការគាំទ្រដល់ប៉ាឡេស្ទីន ហើយបានប្តេជ្ញាថា ពួកគេនឹងបន្តរហូតដល់អ៊ីស្រាអែលបញ្ឈប់ការវាយលុករបស់ខ្លួនលើតំបន់ហ្កាហ្សាស្ទ្រីប ដែលមានចម្ងាយជាង ១.៦០០គីឡូម៉ែត្រពីកន្លែងកាន់កាប់អំណាចរបស់ពួកគេ នៅទីក្រុងសាណា។

ហូធី គឺជាក្រុមមួយក្នុងចំណោមក្រុមជាច្រើននៅក្នុងក្រុមប្រឆាំងដែលមានសម្ព័ន្ធភាពជាមួយអ៊ីរ៉ង់ ដែលបាននិងកំពុងវាយប្រហារអ៊ីស្រាអែល និងសហរដ្ឋអាមេរិក ចាប់តាំងពីការចាប់ផ្តើមនៃជម្លោះ កាលពីថ្ងៃទី៧ ខែតុលា នៅពេលដែលសម្ព័ន្ធមិត្តប៉ាឡេស្ទីនរបស់ពួកគេ គឺក្រុមហាម៉ាស បានបង្កឲ្យមានសង្រ្គាមដោយវាយប្រហារអ៊ីស្រាអែល។

ដោយក្រុមហូធីកំពុងបង្កើនការវាយប្រហារលើការដឹកជញ្ជូន ក្នុងរយៈពេលប៉ុន្មានសប្តាហ៍កន្លងមកនេះ ប្រភព២ ដែលដឹងពីគោលបំណងរបស់អារ៉ាប៊ីសាអ៊ូឌីត បាននិយាយថា សារសុំឲ្យមានភាពអត់ធ្មត់របស់ទីក្រុងរីយ៉ាដទៅកាន់ទីក្រុងវ៉ាស៊ីនតោន មានគោលបំណងបញ្ជៀសការកើនឡើងជម្លោះបន្ថែមទៀត។ ប្រភពនោះបានបន្ថែមថា រហូតមកដល់ពេលនេះ ក្រុងរីយ៉ាដពេញចិត្តនឹងវិធី ដែលសហរដ្ឋអាមេរិក កំពុងដោះស្រាយស្ថានការណ៍នេះ៕