ហែលទឹក៖ សហព័ន្ធកីឡាហែលទឹកកម្ពុជា បានធ្វើការបង្ហាញសមាសភាពអត្តពលិក ត្រូវបញ្ជូនទៅចូលរួមប្រកួតកីឡាអូឡាំពិកទីក្រុងតូក្យូឆ្នាំ២០២០ ដែលលើកមករៀបចំការប្រកួតក្នុងឆ្នាំ២០២១ នេះរួចហើយ រួមមានកីឡាករ ហែម ប៉ុច ដែលកំពុងហ្វឹកហាត់ក្នុងស្រុក និងកីឡាការិនី ឡូស៊ី តានមីននិក ដែលកំពុងហ្វឹកហាត់នៅសហរដ្ឋអាមេរិក ខណៈបេសកកម្មនេះនឹងត្រូវដឹកនាំដោយគ្រូបង្វឹកលោក ហែមថុន ពន្លឺ។
លោក ហែម គិរី អគ្គលេខាធិការសហព័ន្ធកីឡាហែលទឹកកម្ពុជាបានឲ្យដឹងថា ការកំណត់សមាសភាពអត្តពលិកចូលរួមប្រកួតកីឡាអូឡាំពិកនេះ គឺអនុវត្តតាមគោលការណ៍របស់សហព័ន្ធកីឡាហែលទឹកអន្តរជាតិ ដែលផ្ដល់សិទ្ធអនុគ្រោះដល់កម្ពុជាក្នុងការបញ្ជូនកីឡាករ-កីឡាការិនីហែលទឹក ២រូបចូលរួមព្រឹត្តិការណ៍កម្រិតពិភពលោកនេះ ដែលត្រូវប្រកួតលើវិញ្ញាសាហែលចម្ងាយ ៥០ម៉ែត្រសេរីដូចគ្នា។ អគ្គលេខាធិការសហព័ន្ធដដែលបន្ដថា ចំពោះបេសកកម្មនេះ សហព័ន្ធមិនរំពឹងលើការប្រជែងមេដាយនោះទេ ដ្បិតកីឡាករ-កីឡាការិនីកម្ពុជាចូលរួមក្នុងនាមសិទ្ធអនុគ្រោះ តែយ៉ាងណាសហព័ន្ធចង់ឃើញពួកគេបំបែកសិទ្ធិផលចាស់របស់ខ្លួន ដើម្បីត្រៀមបេសកកម្មដ៏សំខាន់មួយទៀតនាចុងឆ្នាំ២០២១ នេះគឺការប្រកួតកីឡាស៊ីហ្គេមនៅវៀតណាម ហើយបើពួកគេធ្វើបានល្អ សហព័ន្ធនឹងជ្រើសរើសពួកគេចូលរួមស៊ីហ្គេមបន្ដទៀត។
គួរបញ្ជាក់ថា កីឡាហែលទឹកគឺជាកីឡាមួយក្នុងចំណោម ២ប្រភេទដែលត្រូវបានសហព័ន្ធអន្តរជាតិ បានផ្ដល់សិទ្ធអនុគ្រោះដល់កម្ពុជាក្នុងការចូលរួមប្រកួតកីឡាអូឡាំពិក ទីក្រុងតូក្យូ ឆ្នាំ២០២០ នៅជប៉ុន ខណៈ ១ប្រភេទទៀតគឺកីឡាអត្តពលកម្ម។ ចំពោះព្រឹត្តិការណ៍ ៤ឆ្នាំម្ដងដែលត្រូវបានពន្យារពេលមករៀបចំការប្រកួតក្នុងឆ្នាំនេះ គ្រោងធ្វើការប្រកួតពីថ្ងៃទី២៣ ខែកក្កដារហូតដល់ថ្ងៃទី៨ ខែសីហា ឆ្នាំ២០២១ ខាងមុខនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
