រដ្ឋក្នុងគ្រាអាសន្ន ត្រូវបានប្រកាស នៅប្រទេសប្រជុំកោះ Seychelles (សីស្ហែល) បន្ទាប់ពីមានការផ្ទុះដ៏ធំមួយ នៅតំបន់ឧស្សាហកម្ម នៅលើកោះដ៏សំខាន់ Mahé ក៏ដូចជាការមានទឹកជំនន់ផងដែរ។

ការផ្ទុះនេះបានបំផ្លិចបំផ្លាញតំបន់នេះ ដោយធ្វើឲ្យអគារពាណិជ្ជកម្មខូចខាត និងបំផ្លិចបំផ្លាញលំនៅឋាន នៅក្បែរនោះ ដោយបន្សល់ទុកនូវការខូចខាតនៅតាមបណ្តោយឆ្នេរភាគខាងកើតនៃកោះ Mahe។ ប្រធានាធិបតីប្រជុំកោះសីស្ហែល លោក Wavel Ramkalawan បានបញ្ជាឲ្យពលរដ្ឋទាំងអស់ស្នាក់នៅក្នុងផ្ទះ លើកលែងតែកម្មករសំខាន់ៗប៉ុណ្ណោះ។

មនុស្សមួយចំនួន បានរងរបួស ហើយជាច្រើននាក់ក៏ត្រូវបានជម្លៀសចេញពីផ្ទះសម្បែងផងដែរ។ ការផ្ទុះនោះបានកើតឡើងភ្លាមៗបន្ទាប់ពីម៉ោង ២:០០ ម៉ោងក្នុងស្រុក (ត្រូវនឹងម៉ោង ២២:00 ម៉ោងសកល នៅថ្ងៃព្រហស្បតិ៍) នៅឯក្រុមហ៊ុនសំណង់ និងធ្វើអាជីវកម្មថ្ម ជាកន្លែង ដែលគ្រឿងផ្ទុះ ត្រូវបានផ្ទុកនៅក្នុងកុងទីណ័រចំនួន៤។

រដ្ឋាភិបាលចក្រភពអង់គ្លេសបានណែនាំពលរដ្ឋរបស់ខ្លួននៅលើកោះ Mahe ស្នាក់នៅតែក្នុងផ្ទះ រហូតដល់មានការជូនដំណឹងបន្ថែម។

ជាមួយគ្នានេះ ភ្លៀងធ្លាក់ខ្លាំងពេញមួយយប់ បានបណ្តាលឲ្យមានទឹកជំនន់យ៉ាងធំ និងបំណាក់ដី ដែលបន្ថែមសម្ពាធដល់ក្រុមឆ្លើយតបរបស់កោះនេះ។ មនុស្ស ៣នាក់ បានស្លាប់នៅពេលដែលផ្ទះរបស់ពួកគេត្រូវបានបំផ្លាញ។ ទឹកជំនន់នេះបានបណ្តាលឲ្យទឹកស្អុយហូរចូលទៅក្នុងមហាសមុទ្រ ហើយមនុស្សម្នាត្រូវបានណែនាំកុំឲ្យចុះទៅហែលទឹក នាពេលនេះ៕