កងកម្លាំងអ៊ីស្រាអែលបានប្រយុទ្ធជាមួយក្រុមសកម្មប្រយុទ្ធហាម៉ាសនៅក្នុងទីក្រុងធំបំផុតរបស់តំបន់​ហ្កាហ្សាស្ទ្រីប កាលពីថ្ងៃព្រហស្បតិ៍ ថ្ងៃទី ៧ខែធ្នូ ដែលបណ្តាល​ឱ្យជនជាតិ​ប៉ាឡេស្ទីន​រាប់រយ​នាក់​ទៀត​បានស្លាប់ ខណៈពលរដ្ឋហ្កាហ្សាជិត ២ លាននាក់បានចល័តទីលំនៅ តស៊ូស្វែងរក​ទីជម្រក​សុវត្ថិភាពស្របពេលមានការកង្វះខាតស្បៀងអាហារ និងទីជម្រកយ៉ាងធ្ងន់ធ្ងរ។

អ្នកស្រុកបានរាយការណ៍ថាការប្រយុទ្ធគ្នាយ៉ាងខ្លាំងក្លាបានកើតឡើងនៅភាគខាងកើតទីក្រុងខាន យូនីស​(Khan Younis)ដែលជាទីក្រុងធំជាងគេនៅហ្កាហ្សាភាគខាងត្បូង ហើយក្រុម​មន្ត្រី​សុខាភិបាល​ប៉ាឡេស្ទីនបាននិយាយថា ពលរដ្ឋហ្កាហ្សា បីនាក់បានស្លាប់នៅ​ក្នុង​ការ​វាយ​ប្រហារ​តាម​អាកាស​របស់អ៊ីស្រាអែលទៅលើផ្ទះមួយនៅទីក្រុងឌៀ អាល់ បាឡា(Deir Al-Balah)នៅ​តំបន់​ហ្កាហ្សា​ភាគកណ្តាល។  

អ៊ីស្រាអែលបាននិយាយថា កងកម្លាំងរបស់ខ្លួនបានសម្លាប់ខ្មាន់កាំភ្លើងជាច្រើននាក់នៅក្នុងទីក្រុង Khan Younis រួមទាំងពីរនាក់ដែលបានបាញ់ប្រហារចេញពីផ្លូវក្រោមដីមួយ។

ទូរទស្សន៍​អ៊ីស្រាអែលបានបង្ហាញវីដេអូដែលសារព័ត៌មាន Reuters មិនអាចផ្ទៀង​ផ្ទាត់​ដោ​យ​ឯករាជ្យ​ពី​អ្វីដែលខ្លួនបាននិយាយថា កងកម្លាំងអ៊ីស្រាអែល​បាន​ចាប់​ខ្លួន​ក្រុម​យុទ្ធជន​ហាម៉ាស​មួយចំនួនដោយបានដោះសម្លៀកបំពាក់ អង្គុយឱនក្បាលចុះនៅតាមផ្លូវក្នុងក្រុងទីក្រុងហ្កាហ្សា។  

ប្រជាជនប៉ាឡេស្ទីនមួយចំនួនបានទទួលស្គាល់សាច់ញាតិ និងបាន​បដិសេធថា​ពួក​គេ​ពុំ​មាន​ទំនាក់​ទំ​នង​ជាមួយក្រុមហាម៉ាស ឬក្រុមផ្សេងទៀតទេ។

កងកម្លាំងអ៊ីស្រាអែល បាននិយាយកាលពីថ្ងៃពុធថា ពួកគេបានឡោមព័ទ្ធ​ផ្ទះមួយ​កន្លែង​របស់​មេដឹកនាំ​ក្រុមហាម៉ាស ខណៈពួកគេកំពុងជាប់ដៃប្រយុទ្ធជាមួយក្រុមសកម្មប្រយុទ្ធប៉ាឡេស្ទីន នៅកណ្ដាលទីក្រុងធំបំផុតរបស់តំបន់ហ្កាហ្សាភាគខាងត្បូង៕