ប្រធានទទួលបន្ទុកការផ្ដល់ជំនួយរបស់អង្គការសហប្រជាជាតិ លោក ម៉ាទីន គ្រីហ្វីតស៍ (Martin Griffiths)បាននិយាយថា ច្រកឆ្លងកាត់ ការឹមអាប៊ូ សាឡឹម (Karem Abu Salem) ដែល​ត្រូវ​បាន​គេ​ស្គាល់ថា ឃេរឹម ហ្សាឡូម (Kerem Shalom) នៅក្នុងប្រទេសអ៊ីស្រាអែល ដែលស្ថិត​នៅ​រវាង​អ៊ីស្រាអែល និងហ្កាហ្សា អាចនឹងបើកក្នុងពេលឆាប់ៗនេះ ដើម្បីអនុញ្ញាត​ឱ្យ​ផ្តល់​ជំនួយ​មនុស្សធម៌​បន្ថែមទៀតទៅកាន់ដែនដីប៉ាឡេស្ទីនដែលហែកហួរដោយសង្រ្គាម។   

លោកគ្រីហ្វីតស៍ បានប្រាប់អ្នកសារព័ត៌មាននៅទីក្រុងហ្សឺណែវកាលពីថ្ងៃព្រហស្បតិ៍ថា យើង​នៅ​តែ​កំពុង​ចរចារ​នៅឡើយ។ មានក្ដីសង្ឃឹម​ច្រើនថា​ច្រក​ឆ្លង​កាត់​ព្រំដែន​នេះ​អាច​នឹង​បើក​ក្នុង​ពេល​ឆាប់ៗ​នេះ។

លោកបាននិយាយថា ជំនួយបច្ចុប្បន្នកំពុងបញ្ជូនទៅកាន់តំបន់ហ្កាហ្សា តាមរយៈច្រក Rafah នៅ​តាមព្រំដែនអេហ្ស៊ីប។ការបើកច្រក ការឹម អាប៊ូ សាឡឹម (Karem Abu Salem) នឹង​ក្លាយ​ជា​អព្ភូត​ហេតុដំបូងដែលយើងបានឃើញរយៈពេលប៉ុន្មានសប្តាហ៍មកនេះ ប៉ុន្តែក៏នឹង​ជា​ការ​ជំរុញ​ដ៏​ធំដល់​ដំណើរការដឹកជញ្ជូនភស្តុភារ និងមូលដ្ឋានដឹកជញ្ជូននៃប្រតិបត្តិការមនុស្សធម៌។   

ប្រធាន​ជំនួយរបស់អង្គការសហប្រជាជាតិរូបនេះ បាន​សង្កត់ធ្ងន់​លើ​តម្រូវ​ការ​សម្រាប់​ជំនួយ​ដែល​ត្រូវ​ផ្តល់​ឱ្យប្រកបដោយនិរន្តរភាព និងរបៀបរៀបរយជាងមុន។ លោកបាននិយាយថា យើង​មិន​មាន​ប្រតិបត្តិការមនុស្សធម៌នៅភាគខាងត្បូងតំបន់ហ្កាហ្សា ដែលអាច​ត្រូវ​បាន​ហៅ​ឈ្មោះ​នោះ​បាន​ទៀត​ទេ​។

ប្រជាជនប៉ាឡេស្ទីនប្រហែល ១,៨ លាននាក់កំពុងរស់នៅក្នុង​តំបន់​ហ្កាហ្សា​ភាគខាង​ត្បូង​បន្ទាប់​ពី​មាន​បញ្ជា​ពីយោធាអ៊ីស្រាអែល​ឱ្យ​ចាក​ចេញ​ពី​ភាគ​ខាង​ជើង​នៃ​តំបន់​រង​ការ​ឡោមព័ទ្ធ​មួយ​នេះ​កាល​ពី​ពាក់​កណ្តាលខែតុលាកន្លងទៅ៕