ភ្នំពេញ៖ សាកលវិទ្យាល័យភូមិន្ទកសិកម្ម​ នៅថ្ងៃទី៨ ខែធ្នូ ឆ្នាំ២០២៣នេះ បាន​រៀបចំ​កម្ម​វិធី​ពិព័រណ៍​ការងារក្នុងវិស័យកសិកម្មជាលើកដំបូង ដើម្បីផ្តល់ឱកាសការងារ ដល់សិស្សនិស្សិត​ក្រោយ​ពេល​បញ្ចប់ការសិក្សាជំនាញផ្សេងៗ ក្នុងវិស័យកសិកម្ម ជា​ពិសេស​ឆ្លើយ​តប​តម្រូវ​ការ​ទីផ្សារ​ការងារក្នុងពេលបច្ចុប្បន្ន និងទៅថ្ងៃអនាគត។

កម្មវិធីនេះ បានប្រព្រឹត្តទៅក្រោមអធិបតីភាពឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ក្នុងគោលបំណងដើម្បីផ្សារភ្ជាប់គម្លាត រវាងឧត្តមសិក្សា និង​វិស័យ​ឯកជន ដោយផ្តល់នូវវេទិកាមួយសម្រាប់និស្សិត អ្នកអប់រំ និងអ្នកជំនាញក្នុងវិស័យកសិកម្ម និង​ឧស្សាហកម្ម ភ្ជាប់ទំនាក់ទំនង ផ្លាស់ប្តូរគំនិត និងស្វែងរកឱកាសនៅក្នុងវិស័យអប់រំកសិកម្ម ដោយ​មាន​ការ​ចូលរួមពីយុវជន និងសិស្សនិស្សិតជាច្រើននាក់ផងដែរ។

នៅក្នុង​ពិធីបើក​ពិព័រណ៍ការងារក្នុងវិស័យកសិកម្មនាព្រឹកថ្ងៃនេះ ឯកឧត្តមរដ្ឋមន្រ្តី បាន​មាន​ប្រសាសន៍​ថា បច្ចុប្បន្នប្រទេស​កម្ពុជា​បាន​ឈាន​ដល់​ដំណាក់​កាល​ថ្មី​មួយ​ទៀត​នៃ​ការ​អភិវឌ្ឍ​ការ​អប់រំ​ក្នុង​វិស័យកសិកម្ម ដូច្នេះការរៀបចំ​កម្មវិធីថ្ងៃនេះ​ក៏​នឹង​ផ្តល់​អត្ថ​ប្រយោជន៍​ជា​ច្រើន​ទៅ​កាន់​យុវជន ជាពិសេសនិស្សិតដែលនឹងជិតបញ្ចប់ថ្នាក់សិក្សាឆ្នាំទី៤ ដើម្បី​ស្វែង​យល់​ពី​ឱកាស​ការងារ​ឲ្យ​ត្រូវ​នឹង​ជំនាញកំពុងសិក្សា និងខណៈក្រសួងកសិកម្ម ក៏កំពុងមាន​តម្រូវ​ការ​ជ្រើសរើស​មន្រ្តី​កសិកម្ម​ឃុំ​ចំនួន ១,៦០០នាក់ ដើម្បីចុះជួយការងារជាមួយប្រជាកសិករ។

ក្រុមនិស្សិតដែលបានចូលរួមក្នុងកម្មវិធីពិព័រណ៍ការងារនេះ បានលើកឡើងស្រដៀងគ្នាថា ពួក​គាត់​ពិត​ជាសប្បាយរីករាយណាស់ នៅពេលដែលសាលារៀបចំកម្មវិធីនេះឡើង ដើម្បីឲ្យពួកគាត់ បាន​ស្គាល់ និងស្វែងយល់កាន់តែលម្អិតអំពីទីផ្សារការងារ និងផ្តល់ឱកាស​បង្កើត​ទំនាក់​ទំនង​ជាមួយ​នយោជក និងបង្ហាញពីភាពសម្បូរបែបនៃការងារក្នុងជំនាញនានា។

សូមជម្រាបជូនថា ពិព័រណ៍ការងារក្នុងវិស័យកសិកម្មនេះ មានរយៈពេលមួយថ្ងៃពេញ ដោយ​មាន​ការ​ចូល​រួម​តាំងបង្ហាញពីឱកាសការងារ សេវាកម្ម និងផលិតផលជាច្រើនរបស់អង្គភាពរដ្ឋ វិស័យ​ឯកជន​ចំនួន ៥៣អង្គភាព ដែលមានស្តង់សរុបចំនួន៦០ស្តង់។ ក្រៅពីការចូលរួមតាំងបង្ហាញ ក៏​មាន​វាគ្មិនកិត្តិយស អញ្ជើញមកពីក្រសួងកសិកម្ម រុក្ខាប្រមាញ់ និង នេសាទ , ក្រសួងអប់រំ យុវជន និង​កីឡា , ក្រសួងពាណិជ្ជកម្ម , ប្រធានក្រុមហ៊ុន ,ម្ចាស់កសិដ្ឋាន ,ប្រធានសមាគមអង្គការ ជា​ច្រើន​រូបទៀត នឹងចូលរួមក្នុងវេទិកាពិភាក្សាចំនួន៣ប្រធានបទ ស្តីពី «បទ​ពិសោធន៍​ការងារ​របស់​អតីត និស្សិត «ការត្រៀមខ្លួនរួចរាល់សម្រាប់គន្លងអាជីពការងារ ក្រោយបញ្ចប់ការសិក្សា» និង «ការ​ជំរុញ​ការបង្កើត អាជីវកម្ម ការចុះកម្មសិទ្ធបញ្ញារបស់និស្សិត កសិករ សហគមន៍ ដែ​ល​ភ្ជាប់​ជា​មួយ​តម្រូវ​ការ​ទីផ្សារ៕ អត្ថបទ៖ ឈិត បូរ៉ាវី