សមាគម Shanty Town Spirit នៅរាត្រីថ្ងៃទី ៧ ខែធ្នូ ឆ្នាំ ២០២៣នេះ បានរៀបចំ ពិធីគម្រប់ខួប ១០ឆ្នាំ​ក្នុងការជួយដល់ប្រជាពលរដ្ឋក្រីក្រក្នុងសហគមន៍។ ការប្រារព្ធ​ពិធី​នេះ​ក៏​ជា​ឱកាស​មួយ​ដើម្បី​ថ្លែង​អំណរគុណដល់ជនសប្បុរស ដែលបានចូលរួម​ជួយ​ឧបត្ថម្ភ​តាំង​ពី​ដើម​រហូត​ដល់​បច្ចុប្បន្ន​ផងដែរ។

សមាគម Shanty Town Spirit ជាសមាគមមួយនៅកម្ពុជា ដែលកំពុង​បន្ត​បេសកកម្ម​ជួយ​ដល់​ប្រជាពលរដ្ឋ​មាន​ជីវភាពក្រលំបាក។ ឈានចូលមកដល់ខែ ធ្នូ ឆ្នាំ ២០២៣នេះ សមាគមបាន​បំពេញ​សកម្មភាព​ក្នុងការជួយដល់ សហគមន៍ក្រីក្ររយៈពេល ១០ឆ្នាំមកហើយ។

ក្នុងឱកាស​គម្រប់ខួប១០ឆ្នាំ នៃដំណើរការរបស់ខ្លួននេះ សមាគម Shanty Town Spirit ក៏​បាន​រៀបចំ​ពិធី​ជួបជុំ ជាមួយសប្បុរសជន បណ្ដាក្រុមហ៊ុន ជាច្រើន ដើម្បីថ្លែង​អំណរ​គុណ​ដល់​ការ​ជួយ​សមាគម ក្នុងកិច្ចការមនុស្សធម៌កន្លងមកនេះ។

ក្នុងឱកាសនោះ ព្រះនាង Ermine ជាស្ថាបនិកនៃ Shanty Town Spirit បានមានបន្ទូល អរគុណ​ដល់សប្បុរសជនទាំងអស់ ដែលបាន​ចូលរួម​ឱ្យ​កិច្ច​ការ​មនុស្ស​ធម៌​មួយ​នេះ​ឱ្យ​ដំណើរ​ការ​ទៅ​បាន និងបានជួយលើកកម្ពស់ការរស់នៅរបស់គ្រួសារជាច្រើនក្នុងសហគមន៍។ ទន្ទឹម​នឹង​កិច្ច​ការ​ជា​ច្រើន​ដែលសម្រេចបានរយៈពេល១០ឆ្នាំមកនេះ ព្រះនាងមានបន្ទូលថែម ថា​សមាគម​នឹង​បន្ត​កិច្ចការ​សំខាន់បន្តបន្ទាប់ទៀតដើម្បីសហគមន៍។

ព្រះអង្គម្ចាស់ នរោត្តម ណារិទ្ធីពង្ស ( Norodom Narithipong ) ក៏បានមានបន្ទូលថែម ដោយ​ថ្លែង​អំណរគុណជូនដល់ រាល់អ្នកឧបត្ថម្ភគាំទ្រ ជួយជាថវិកា និងសម្ភារ ក្នុង​ដំណើរ​ការ​ជួយ​ដល់​សហគម​ក្រីក្រ​រយៈពេល ១០ឆ្នាំមកនេះផងដែរ។

 សមាគម Shanty Town Spirit  បានចាប់ផ្ដើមជួយដល់សហគមន៍ក្រីក្រ រយៈពេល​១០​ឆ្នាំ​មក​ហើយ​។ សមាគមនេះ បច្ចុប្បន្ននៅតែបន្តជួយដល់ សហគមន៍ក្រីក្រដែលរស់នៅក្នុងតំបន់ ស្ថានីយ៍​បូម​ទឹកបឹងត្របែក។ បេសកម្មរបស់ សមាគមនេះផ្តោតលើកិច្ចការជាច្រើន ដោយរាប់​បញ្ចូល​ទាំង​ការអប់រំ ការលើកកម្ពស់ជីវភាព ការថែទាំសុខភាព អនាម័យ និងកិច្ចការជាច្រើនទៀត ពិសេស​គឺផ្តោតជួយលើប្រជាពលរដ្ឋគ្រប់ក្រុមអាយុ ចាប់រាប់ពីកុមារ យុវជន មនុស្សវ័យកណ្ដាល និងមនុស្សចាស់ជរាផងដែរ៕ អត្ថបទ៖ គឹមហុក