នៅថ្ងៃទី៨ ខែធ្នូ ឆ្នាំ២០២៣នេះ នៅទីស្តីការក្រសួងមហាផ្ទៃ បានបើកប្រជុំ​ផ្សព្វផ្សាយ​ការងារ​កំណែ​ទម្រង់វិមជ្ឈការ វិសហមជ្ឈការ និងគណនេយ្យភាពសង្គមជាមួយបណ្តាសារពត៌មាន។ នៅ​ក្នុង​កិច្ច​ប្រជុំនេះ ឯកឧត្តម ចាន់ សុធា អនុប្រធាន​លេខាធិការដ្ឋាន​គណៈកម្មាធិការ​ជាតិ​សម្រាប់​ការ​អភិវឌ្ឍប្រជាធិបតេយ្យនៅថ្នាក់ក្រោមជាតិ គ.ជ.អ.ប បញ្ជាក់ថា ឆ្នាំ២០២៤នេះ រាជ​រដ្ឋាភិបាល​បាន​គ្រោងបង្កើនការចំណាយថវិកាជាតិរហូតដល់ ១៧០០លានដុល្លារ ស្មើនឹង ២០% នៃ​ថវិកាជាតិសរុប ដើម្បីអភិវឌ្ឍមូលដ្ឋានឃុំសង្កាត់ទូទាំងប្រទេស។

ឯកឧត្តម ចាន់ សុធា បានថ្លែងថា ថវិកាជាតិ​ដែល​គ្រោង​ចំណាយ​ដើម្បី​អភិវឌ្ឍ​មូលដ្ឋាន​នៅ​ឆ្នាំ​២០២៤ គឺមានចំនួនកើនឡើងប្រមាណជាង ៤0០ លានដុល្លារ ខណៈនៅក្នុងឆ្នាំ២០២៣ រាជ​រដ្ឋាភិបាលបានចំណាយថវិកាជាតិសម្រាប់អភិវឌ្ឍន៍មូលដ្ឋានថ្នាក់ក្រោមជាតិមានប្រមាណ ១២៥៥ លានដុល្លារ ស្មើនឹង១៧% នៃថវិកាជាតិសរុប។

ឯកឧត្តម ចាន់ សុធា បញ្ជាក់ថា ក្នុង​ចំណោម​ធនធាន​ថវិកា​ជាតិ​ដែល​ផ្ទេរ​ទៅ​ឲ្យ​រដ្ឋបាល​នៅ​ថ្នាក់​ក្រោម​ជាតិ​ឆ្នាំ២០២៣ ទាំង១២៥៥លានដុល្លារនោះ គឺរដ្ឋបាលថ្នាក់ឃុំសង្កាត់ទទួលបាន ២៥៥ លាន​ដុល្លារ រដ្ឋបាលថ្នាក់ស្រុកខ័ណ្ឌទទួលបាន ១៦២ លានដុល្លារ និងថ្នាក់​រាជ​ធានី​ខេត្ត​ទទួល​បាន​ជាង ៨០០ លានដុល្លារ។

ឯកឧត្តមបញ្ជាក់ថា បច្ចុប្បន្ននេះ រដ្ឋបាលថ្នាក់ជាតិ បានផ្ទេរមុខងារប្រមាណជាង ២០ វិស័យ​ទៅ​ឲ្យ​រដ្ឋបាលថ្នាក់ក្រោមជាតិ និងបានផ្ទេរមន្ត្រីទៅបម្រើការនៅថ្នាក់ក្រោមជាតិ មានប្រមាណជាង ៤ ម៉ឺននាក់ ហើយនៅឆ្នាំ២០២៤នេះ រដ្ឋបាល​ថ្នាក់ជាតិ​នឹង​បន្ត​ផ្ទេរ​មន្ត្រី​ទៅ​បម្រើ​នៅថ្នា​ក់​ក្រោម​ជាតិ​ប្រមាណ​ជាង ៦ ម៉ឺននាក់ទៀត ដែលភាគច្រើនគឺជាមន្ត្រីគ្រូបង្រៀននៅថ្នាក់បឋមសិក្សា និង​មត្តេយសិក្សា ។

ឯកឧត្តមបន្តថា តាមរយៈការ​ផ្ទេរ​មុខងារ​ទាំង​វិស័យ​២០​ទៅ​ឲ្យ​រដ្ឋបាល​ថ្នាក់​ក្រោមជាតិ​ជា​អ្នក​ទទួល​ខុស​ត្រូវ និងនៅជិតជាមួយពលរដ្ឋនោះ គឺបានជំរុញ​ឲ្យ​មូលដ្ឋាន​ឃុំ​សង្កាត់​ទទួល​បាន​ការ​អភិវឌ្ឍ​ជា​បន្តបន្ទាប់ ដូចជា ការធានាផ្តល់សេវាជូនពលរដ្ឋលឿនរហ័ស ការទទួលបានស្ថាបនាផ្លូវ និង​អភិវឌ្ឍវិស័យអប់រំ សុខាភិបាល និងបរិស្ថានជាដើមកាន់តែប្រសើរឡើង៕ អត្ថបទ៖ ស៊ុម សុខជា