ក្រសួងយុត្តិធម៌អាមេរិក កាលពីថ្ងៃព្រហស្បតិ៍ (០៧ ធ្នូ) បានដាក់ពាក្យបណ្ដឹងចោទប្រកាន់ព្រហ្មទណ្ឌថ្មីប្រឆាំងនឹងកូនប្រុសរបស់ប្រធានាធិបតីអាមេរិក ចូ បៃដិន (Joe Biden) គឺលោក ហាន់ធឺ បៃដិន (Hunter Biden) ដោយចោទប្រកាន់ថាគេចវេសមិនបានបង់ពន្ធចំនួន ១,៤លានដុល្លារ ខណៈដែលចំណាយប្រាក់រាប់លានដុល្លារលើការរស់នៅដ៏ខ្ជះខ្ជាយរបស់ខ្លួន។

លោក ហាន់ធឺ បៃដិន វ័យ ៥៣ឆ្នាំត្រូវបានរងការវាយប្រហារដោយបទឧក្រិដ្ឋចំនួន ៣ករណីនិងបទល្មើសពន្ធដារចំនួន ៦ករណី នេះបើយោងតាមការចោទប្រកាន់ដែលបានបញ្ជូនទៅតុលាការស្រុកអាមេរិក នៃរដ្ឋកាលីហ្វ័រនីញ៉ា។

តុលាការបានបន្ថែមថា ជំនួសមកវិញលោកហាន់ធឺ បានចំណាយប្រាក់យ៉ាងច្រើនសន្ធឹកសន្ធាប់ ទៅលើ «គ្រឿងញៀន នារីកំដរ និងមិត្តស្រី សណ្ឋាគារប្រណីតៗ និងអចលនទ្រព្យសម្រាប់ជួល រថយន្តទំនើប សម្លៀកបំពាក់ និងរបស់របរប្រើប្រាស់ផ្ទាល់ខ្លួនផ្សេងទៀត« រួមទាំងចំណាយប្រាក់ជាង ៧ម៉ឺនដុល្លារលើការស្តារនីតិសម្បទាពីគ្រឿងញៀន។

លោកអាចប្រឈមនឹងការជាប់ពន្ធនាគាររហូតដល់ ១៧ឆ្នាំ ប្រសិនបើត្រូវបានកាត់ទោស។ ក្រសួងយុត្តិធម៌បាននិយាយថា ការស៊ើបអង្កេតរបស់ខ្លួនកំពុងបន្ត ហើយមេធាវីរបស់លោក ហាន់ធឺ បៃដិន មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ ហើយសេតវិមានក៏បានបដិសេធមិនធ្វើអត្ថាធិប្បាយដែរ។

ការចោទប្រកាន់នេះ គឺជាសំណុំរឿងព្រហ្មទណ្ឌទីពីរដែលធ្វើឡើងប្រឆាំងនឹងលោកកូនប្រុសលោកប្រធានាធិបតី បៃដិន ដោយលោក ដេវីដ វេយស៍ (David Weiss) ដែលជាទីប្រឹក្សាពិសេសត្រូវបានតែងតាំងដោយលោកអគ្គមេធាវី មឺរីក ហ្កាឡែន (Merrick Garland) ដើម្បីត្រួតពិនិត្យការស៊ើបអង្កេតលើកូនប្រុសរបស់ប្រធានាធិបតីរូបនេះ៕