ដោយយោងតាមការស៊ើបការណ៍សម្ងាត់ ដែលខ្លួនប្រមូលបាន កោះតៃវ៉ាន់ បានឲ្យដឹងថា បណ្ដាមេដឹកនាំជាន់ខ្ពស់របស់ចិន បានបើកកិច្ចប្រជុំមួយនៅដើមខែធ្នូនេះ ដើម្បី «សម្របសម្រួល» ដល់កិច្ចប្រឹងប្រែងរបស់រដ្ឋាភិបាល ក្នុងការគ្រប់គ្រងដល់ការបោះឆ្នោតនាពេលខាងមុខរបស់កោះនេះ ជាផ្នែកនៃយុទ្ធនាការដែលមន្ត្រីកោះតៃវ៉ាន់មើលឃើញថា ជាការជ្រៀតជ្រែកដល់ការបោះឆ្នោត។

មន្ត្រីកោះតៃវ៉ាន់បានព្រមានថា ទីក្រុងប៉េកាំងកំពុងព្យាយាមជំរុញអ្នកបោះឆ្នោតឲ្យឆ្ពោះទៅរកបេក្ខជន ដែលស្វែងរកទំនាក់ទំនងជិតស្និទ្ធជាមួយប្រទេសចិន នៅក្នុងការបោះឆ្នោតជ្រើសរើសមេដឹកនាំ និងអង្គនីតិបញ្ញត្តិ នៅថ្ងៃទី១៣ ខែមករា ឆ្នាំ២០២៤ ដែលព្រឹត្តិការណ៍នេះ កំពុងកើតឡើង ក្នុងពេលដែលចិនបង្កើនសម្ពាធផ្នែកយោធា និងនយោបាយ ដើម្បីព្យាយាមបង្ខំឲ្យកោះដែលគ្រប់គ្រងតាមបែបប្រជាធិបតេយ្យមួយនេះ ទទួលយកអធិបតេយ្យភាពរបស់ខ្លួន។

បើយោងតាមមន្ត្រីសន្តិសុខកោះតៃវ៉ាន់ជាច្រើនរូប ដែលបាននិយាយពីបញ្ហានេះជាមួយអ្នកសារព័ត៌មាន បានលើកឡើងថា កិច្ចប្រជុំនៅទីក្រុងប៉េកាំង ត្រូវបានធ្វើឡើងដោយមេដឹកនាំលំដាប់ទី៤ របស់គណបក្សកុម្មុយនីស្តចិនលោក Wang Huning ដែលក៏ជាអនុប្រធានក្រុមនាំមុខមជ្ឈិមរបស់ទីក្រុងប៉េកាំង សម្រាប់កិច្ចការកោះតៃវ៉ាន់ ដែលដឹកនាំដោយប្រធានាធិបតី លោក Xi Jinping។

ដោយដកស្រង់ព័ត៌មានពីការស៊ើបការណ៍សម្ងាត់ ដែលកោះតៃវ៉ាន់ប្រមូលបាន មន្ត្រីសន្តិសុខកោះតៃវ៉ាន់ បាននិយាយថា បុគ្គលិកជាន់ខ្ពស់មកពីអង្គភាពនានា រួមមាននាយកដ្ឋានផ្សព្វផ្សាយរបស់ប្រទេសចិន ក្រសួងសន្តិសុខរដ្ឋ ក្រសួងការពារជាតិ និងការិយាល័យកិច្ចការកោះតៃវ៉ាន់ បានចូលរួម៕