សហរដ្ឋអាមេរិក និងម៉ិកស៊ិកបានព្រមព្រៀងគ្នា កាលពីថ្ងៃប្រហស្បតិ៍ (ទី៧ ខែធ្នូ) ដើម្បីធ្វើកិច្ចសហប្រតិបត្តិការលើការត្រួតពិនិត្យកាន់តែខ្លាំងឡើងលើការវិនិយោគ ដើម្បីកាត់បន្ថយហានិភ័យសន្តិសុខជាតិ និងពិភាក្សាអំពីការរួមបញ្ចូលប្រព័ន្ធទូទាត់ឆ្លងប្រទេស ប៉ុន្តែក្នុងដំណើរទស្សនកិច្ចរបស់ខ្លួន នៅប្រទេសជិតខាងនេះ រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី Janet Yellen បានទទូចថា វិធានការនេះមិនត្រូវបានជំរុញដោយសារការព្រួយបារម្ភពីប្រទេសចិននោះទេ។

កិច្ចប្រឹងប្រែងនេះ មានគោលបំណងជួយប្រទេសម៉ិកស៊ិកបង្កើតស្ថាប័នត្រួតពិនិត្យស្រដៀងនឹងគណៈកម្មាធិការគ្រប់គ្រងដោយក្រសួងរតនាគារលើការវិនិយោគបរទេសរបស់សហរដ្ឋអាមេរិក (CFIUS) ដែលពិនិត្យមើលការទិញក្រុមហ៊ុនអាមេរិករបស់អង្គភាពគ្រប់គ្រងដោយបរទេស និងការវិនិយោគផ្សេងទៀត។

ដំណើរទស្សនកិច្ចរបស់លោកស្រី Yellen ផ្តោតលើការពង្រឹងទំនាក់ទំនងសេដ្ឋកិច្ច និងជំរុញកិច្ចសហប្រតិបត្តិការ ដើម្បីទប់ស្កាត់លំហូរសារធាតុហ្វង់តានីលដ៏គ្រោះថ្នាក់ទៅកាន់សហរដ្ឋអាមេរិកតាមរយៈម៉ិកស៊ិក ជាកន្លែង ដែលសារធាតុគីមីនាំមុខគេមកពីចិននេះ ត្រូវបានយកមកផ្សំបញ្ចូលគ្នាជាញឹកញាប់។

ចំណែករដ្ឋមន្ត្រីហិរញ្ញវត្ថុម៉ិកស៊ិក លោក Rogelio Ramirez បានស្នើសុំជំនួយក្នុងការប្រយុទ្ធប្រឆាំងនឹងលំហូរនៃអាវុធពីសហរដ្ឋអាមេរិកទៅក្នុងដៃរបស់ក្រុមឧក្រិដ្ឋជនម៉ិកស៊ិក ដែលលោកបាននិយាយថា ជារឿយៗ មានអាវុធទំនើបជាងនាយកដ្ឋាននគរបាល និងយោធារបស់ប្រទេសម៉ិកស៊ិក៕