ភ្នំពេញ ៖ អគ្គលេខាធិការរងរបស់អង្គការសហប្រជាជាតិទទួលបន្ទុកផ្នែករក្សាសន្តិភាព លោក ចន ព្យែរ ឡា ក្រស (Jojn Pierre Lacroix) បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានលះបង់នូវយុវជន យុវនារីរបស់ខ្លួនក្នុងប្រតិបត្តិការរក្សាសន្តិភាពសម្រាប់ពិភពលោក បើទោះបីជាការបរិច្ចាកនេះបានប្រឈមនឹងហានិភ័យ និងភាពស្មុគស្មាញច្រើនក៏ដោយនោះ។

 នៅក្នុងកិច្ចជំនួបទ្វេភាគីជាមួយនាយឧត្តមសេនីយ៍ ទៀ សីហា ឧបនាយករដ្ឋមន្រ្តីរដ្ឋមន្រ្តីក្រសួង ការពារជាតិកម្ពុជា នៅទីក្រុងអាក្រា(ACCRA) សាធារណរដ្ឋហ្គាណា (Ghana) កាលពីថ្ងៃទី៧ ខែធ្នូ ឆ្នាំ ២០២៣ម្សិលមិញនេះលោក ចន ព្យែរ ឡា ក្រសលើកឡើងថាក្នុងនាំអង្គការសហប្រជាតិអំណរគុណ ការបរិច្ចាកដ៏ធំធេងពីសំណាក់យុទ្ធជន យុទ្ធនារីកម្ពុជា ក្នុងប្រតិបត្តិការរក្សាសន្តិភាព ដែលការបរិច្ចាកកម្លាំងនេះមានសារៈសំខាន់ណាស់ ដែលកងកម្លាំងរបស់កម្ពុជាបានចូលរួមក្នុងបេសកកម្មពេលខ្លះប្រឈម នឹងហានិភ័យខ្ពស់ និង មានភាពស្មុកស្មាញ។

 លោកអគ្គលេខាធិការរងបានបញ្ជាក់បន្ថែមទៀតថា អង្គការសហប្រជាជាតិ នឹងបន្តការសហការគាំទ្រដល់ការចូលរួមរបស់កម្ពុជាបន្តទៀត ក្នុងនោះលោកបានចាត់ទុកការបេជ្ញាចិត្តរបស់កម្ពុជាដែលបានថ្លែងក្នុងកិច្ចប្រជុំថ្នាក់រដ្ឋមន្ត្រី ស្តីពីការរក្សាសន្តិភាពក្នុងក្របខណ្ឌអង្គការសហប្រជាជាតិលើកទី ៧ គឺមានសារៈសំខាន់ណាស់ ដែលកម្ពុជា បានបញ្ចូលកងកម្លាំងក្នុងប្រពន្ធ័ត្រៀមជាស្រេច គឺមានកងកំទេចគ្រឿងផ្ទុះបោសំអាតមីន គឺជាសមត្ថភាពដ៏សំខាន់ក្នុងតំបន់បេសកកម្ម ដែលកម្ពុជាមានសមត្ថភាពខ្ពស់ និងជំនាញក្នុងការបន្សាបឧបករណ៍គ្រឿងផ្ទុះកែច្នៃផង និងការបោសំអាតមីនផងដែរ។ 

 នៅក្នុងកិច្ចជំនួបនោះដែរ នាយឧត្តមសេនីយ៍ ទៀ សីហា ក៏បានថ្លែងអំណរគុណចំពោះអង្គការសហប្រជាជាតិ ដែលបានគាំទ្រចំពោះកម្ពុជាក្នុងបេសកកម្មរក្សាសន្តិភាពរបស់អង្គការសហប្រជាជាតិ និង អនុញាតឲ្យកម្ពុជាបន្តបេសកកម្មថែរក្សាសន្តិភាពរបស់អង្គការសហប្រជាជាតិ។ នាយឧត្តមសេនីយ៍ ទៀ សីហា បានបញ្ចាក់ពីការបន្តបេ្តជ្ញារបស់កម្ពុជាក្នុងបញ្ចូលកម្លាំងក្នុងប្រពន្ធ័ត្រៀមជាស្រេច ដែលមាន ១ កងវិស្វកម្មព្រលានយន្តហោះ -១ កងកំទេចគ្រាប់មិនទាន់ផ្ទុះ , បោសសំអាតមីន- ១ កងអាវុធហត្ថ និង ១ កងស្ពានលើគោក និង បណ្តែតទឹក ដើម្បីឆ្លើយតបអោយបានទាន់ពេលវេលានៅពេលមានសំណូមពរពីអង្គការសហប្រជាជាតិផងដែរ៕ អត្ថបទ ៖ បាន ចក់