អាស៊ែរបៃហ្សង់ និងអាមេនី បានយល់ព្រមលើការដោះដូរអ្នកទោស និងធ្វើការឆ្ពោះទៅរកការធ្វើប្រក្រតីភាពទំនាក់ទំនងឡើងវិញ និងកិច្ចព្រមព្រៀងសន្តិភាពចំពោះជម្លោះដែលអូសបន្លាយអស់ជាច្រើនទសវត្សរ៍ ជាការសម្រេចមួយដែលសហរដ្ឋអាមេរិក និងសហភាពអឺរ៉ុប បានស្វាគមន៍។

សេចក្តីថ្លែងការណ៍រួមដែលចេញផ្សាយដោយទីភ្នាក់ងារព័ត៌មានរដ្ឋរបស់អាស៊ែរបៃហ្សង់ AZERTAC បានឲ្យដឹងថា អាស៊ែរបៃហ្សង់ នឹងដោះលែងអ្នកទោសសង្គ្រាមចំនួន ៣២ នាក់ទៅប្រទេសអាមេនី ជាថ្នូរនឹងសមាជិកយោធាពីរនាក់។  

សេចក្តីថ្លែងការណ៍ បានសរសេរថា៖«សាធារណរដ្ឋអាមេនី និងសាធារណៈរដ្ឋអាស៊ែរបៃហ្សង់ ចែករំលែក   ទស្សនៈថា មានឱកាសជាប្រវត្តិសាស្ត្រ ដើម្បីសម្រេចបានសន្តិភាពដែលរង់ចាំជាយូរមកហើយ នៅក្នុងតំបន់នេះ។ ប្រទេសទាំងពីរ បានបញ្ជាក់ឡើងវិញនូវចេតនារបស់ពួកគេ ក្នុងការធ្វើប្រក្រតីភាពទំនាក់ទំនង និងឈានដល់សន្ធិសញ្ញាសន្តិភាព ដោយឈរលើមូលដ្ឋាននៃការគោរពចំពោះគោលការណ៍អធិបតេយ្យភាព និងបូរណភាពទឹកដី។ ការទម្លាយភាពទាល់ច្រកនេះ កើតឡើង បន្ទាប់ពីកិច្ចពិភាក្សារវាងការិយាល័យរបស់ប្រធានាធិបតីអាស៊ែរបៃហ្សង់ និងនាយករដ្ឋមន្ត្រីអាមេនី។

សេចក្តីថ្លែងការណ៍ដដែល បានសរសេរទៀតថា៖«កិច្ចព្រមព្រៀងមួយ ត្រូវបានសម្រេចទៅលើការចាត់វិធានការជាក់ស្តែង ឆ្ពោះទៅរកការកសាងទំនុកចិត្តរវាងប្រទេសទាំងពីរ» ។

អ្នកនាំពាក្យក្រសួងការបរទេសសហរដ្ឋអាមេរិក លោក Matthew Miller បាននិយាយថា ការដោះដូរអ្នកទោស គឺជាវិធានការកសាងទំនុកចិត្តដ៏សំខាន់ នៅពេលដែលប្រទេសទាំងពីរ ធ្វើការឆ្ពោះទៅរកកិច្ចព្រមព្រៀងសន្តិភាព។