បេក្ខជនអនុរដ្ឋមន្ត្រីការបរទេសអាមេរិក លោក Kurt Campbell កាលពីថ្ងៃព្រហស្បតិ៍ (ទី៧ ខែធ្នូ) បានព្រមានពីហានិភ័យ ពាក់ព័ន្ធនឹងកូរ៉េខាងជើង ដោយនិយាយថា រដ្ឋឯកោមួយនេះកំពុងបន្តពង្រឹងសមត្ថភាពរបស់ខ្លួន ក្នុងការបាញ់អាវុធចម្ងាយឆ្ងាយ ហើយមិនចាប់អារម្មណ៍ ក្នុងការស្វែងរកដំណោះស្រាយការទូត ជុំវិញការប្រឈមមុខដាក់គ្នាជាមួយលោកខាងលិចនោះឡើយ។

លោក Campbell បានធ្វើការកត់សម្គាល់របស់លោកនៅឯសវនាការបញ្ជាក់របស់ព្រឹទ្ធសភា ដែលរូបលោកត្រូវបានចោទសួរអំពីរុស្ស៊ី ចិន និងកូរ៉េខាងជើង។ លោកបានសម្តែងការព្រួយបារម្ភថា កូរ៉េខាងជើង «លែងចាប់អារម្មណ៍លើផ្នែកការទូតជាមួយសហរដ្ឋអាមេរិកទៀតហើយ» ហើយបានបន្ថែមថា សហរដ្ឋអាមេរិកនឹងត្រូវ «ផ្តោតកាន់តែខ្លាំងឡើងបន្ថែមទៀតលើការរារាំង»។

ក្នុងអំឡុងពេលសវនាការនោះ លោក Campbell ក៏បាននិយាយផងដែរថា លោកមានទំនុកចិត្តថា ប្រទេសចិននឹងមិនជោគជ័យក្នុងការកសាងចំណងនៃការទុកចិត្តជាមួយកូរ៉េខាងត្បូង និងជប៉ុន ដែលការផ្សះផ្សាទំនាក់ទំនងរបស់ពួកគេ នឹងមានសារៈសំខាន់ចំពោះសន្តិសុខនៃតំបន់ឥណ្ឌូប៉ាស៊ីហ្វិក៕