រដ្ឋមន្ត្រីការបរទេសរបស់ចក្រភពអង់គ្លេស លោក David Cameron កាលពីថ្ងៃព្រហស្បតិ៍ (ទី៧ ខែធ្នូ) បានជំរុញឲ្យសមាជិកសភាអាមេរិកអនុម័តជំនួយថ្មី សម្រាប់ប្រទេសអ៊ុយក្រែន ដើម្បីជួយផ្តល់មូលនិធិដល់ការប្រយុទ្ធរបស់ទីក្រុងគីវ ប្រឆាំងនឹងកងកម្លាំងរុស្ស៊ី។

កាលពីថ្ងៃពុធ ព្រឹទ្ធសភាអាមេរិកបានរារាំងសំណើសេតវិមាន សម្រាប់ជំនួយសង្គ្រោះបន្ទាន់ចំនួន ១០៦ពាន់លានដុល្លារ ដែលជាជំនួយចម្បង សម្រាប់អ៊ុយក្រែន និងអ៊ីស្រាអែល ជាការសម្រេច ដែលឥស្សរជនជាន់ខ្ពស់លោក Cameron បានពណ៌នាថា ជាការផ្ដល់ «អំណោយបុណ្យណូអែល» ដល់ប្រធានាធិបតីចិន លោក Xi Jinping និងប្រធានាធិបតីរុស្ស៊ី លោក Vladimir Putin។

នេះគឺជាការខកចិត្តមួយសម្រាប់ប្រធានាធិបតីអាមេរិក លោក Joe Biden ដែលបានជំរុញឲ្យសមាជិកសភាអនុម័តលើមូលនិធិ ដោយព្រមានថា លោក Putin នឹងមិនបញ្ឈប់ជាមួយនឹងជ័យជម្នះ នៅក្នុងប្រទេសអ៊ុយក្រែននោះទេ ហើយថែមទាំងអាចវាយប្រហារប្រទេសសមាជិករបស់អង្គការណាតូផងដែរ។

ពាក់ព័ន្ធនឹងការមិនទទួលបានការអនុម័តនេះ លោក Cameron បានប្រាប់វេទិកាសន្តិសុខ Aspen នៅឯរដ្ឋធានីរបស់សហរដ្ឋអាមេរិកថា៖ «យើងគួរតែប្រគល់ប្រាក់នេះទៅឲ្យប្រជាជនអ៊ុយក្រែន។ យើងគួរតែគាំទ្រពួកគេ ហើយត្រូវប្រាកដថា គឺលោក Putin ជាអ្នកចាញ់ ព្រោះប្រសិនបើប្រាក់នោះមិនត្រូវបានអនុម័តទេ មានតែមនុស្ស ២នាក់ប៉ុណ្ណោះ ដែលនឹងញញឹម។ ម្នាក់ក្នុងចំណោមនោះ គឺលោក Putin ហើយម្នាក់ទៀត គឺលោក Xi Jinping នៅទីក្រុងប៉េកាំង។ ហើយខ្ញុំមិនដឹងពីអ្នកនោះទេ ប៉ុន្តែខ្ញុំមិនចង់ផ្តល់អំណោយបុណ្យណូអែលដល់មនុស្សទាំងនោះឡើយ»៕