ប្រជាពលរដ្ឋហ្គាហ្សា ដែលបង្ខំចិត្តជម្លៀសទៅកាន់ទីក្រុងភាគខាងត្បូង Rafah និយាយថា អាហារតិចតួចដែលពួកគេទទួលទានគឺគ្មានជីវជាតិនោះទេ ក្រុមគ្រួសារបង្ខំចិត្តចែករំលែកចំណីអាហារគ្នា ហើយភាគច្រើននៃពួកគេទទួលទានតែម្តងប៉ុណ្ណោះក្នុង១ថ្ងៃ ហើយពួកគេមួយចំនួន ជាពិសេសកុមារ បានធ្លាក់ខ្លួនឈឺ និងស្រេកឃ្លានខ្លាំង ។

ក្នុងសាលារៀនមួយកន្លែងនៅទីក្រុង Rafah សម្លៀកបំពាក់ហាលលើស្នួលខោអាវ ហើយសំពត់តង់ធ្វើលើសួនច្បារផ្តល់ជម្រកដល់បុរស ស្រ្តី និងកុមារដែលជម្លៀសចេញពីការទម្លាក់គ្រាប់បែករបស់អ៊ីស្រាអែលនៅតំបន់ហ្គាហ្សាស្រ្ទីប ។

ចាប់តាំងពីបទឈប់បាញ់រយៈពេល ១សប្តាហ៍ បានបញ្ចប់កាលពីថ្ងៃទី ១ ខែធ្នូរ លំហូររថយន្តដឹកជំនួយពីអេហ្ស៊ីប ចូលទៅក្នុងតំបន់ហ្គាហ្សា បានធ្លាក់ចុះ ដែលអាចត្រឹមតែចូលដល់តំបន់ជ្រោយភាគខាងត្បូងប៉ុណ្ណោះ ។

លោក Zakaria Rehan គឺជាពលរដ្ឋហ្គាហ្សាដែលបានជម្លៀសខ្លួនមួយរូបនិយាយថា បាទ មានជំនួយមកដល់ ប៉ុន្តែវាមិនគ្រប់គ្រាន់ទាល់តែសោះ វាមិនគ្រប់គ្រាន់សម្រាប់គ្រួសារនោះទេ ។

លោកបន្តថា អ្នកទទួលបានសណ្តែមួយកំប៉ុង ឬសាច់មួយកំប៉ុង សម្រាប់មនុស្ស ១០នាក់ បើមនុស្សម្នាក់ គឺហូបវាអស់ទៅហើយៗធ្វើឲ្យគាត់មិនឆ្អែតទៀតផង ៕