អាមេរិក ៖ បំណងពិសេសរបស់អង្គការសហប្រជាជាតិដើម្បីអំពាវនាវឱ្យមានបទឈប់បាញ់នៅតំបន់ហ្កាហ្សា ត្រូវបានរារាំងដោយសហរដ្ឋអាមេរិកកាលពីថ្ងៃសុក្រទី៨ ខែធ្នូ ខណៈកងកម្លាំងអ៊ីស្រាអែល បន្តការវាយលុកឥតឈប់ឈរដើម្បីកម្ទេចក្រុមហាម៉ាស បន្ទាប់ពីការវាយប្រហារដ៏ឃោឃៅរបស់ក្រុមនេះកាលពី២ខែមុន។ យោងតាមចំនួនអ្នកស្លាប់ចុងក្រោយពីក្រសួងសុខាភិបាលគ្រប់គ្រងដោយក្រុមហាម៉ាស បានឲ្យដឹងថា ការប្រយុទ្ធគ្នានេះបានបណ្តាលឲ្យមនុស្ស ១៧.៤៨៧នាក់បានស្លាប់នៅក្នុងដែនដីប៉ាឡេស្ទីន ភាគច្រើនជាស្ត្រី និងកុមារ។ យោងតាមតួលេខរបស់អ៊ីស្រាអែលបានឲ្យដឹងថា អ៊ីស្រាអែល បានប្តេជ្ញាលុបបំបាត់ក្រុមហាម៉ាស ជុំវិញការវាយប្រហារដែលមិនធ្លាប់មានពីមុនមក កាលពីថ្ងៃទី ៧ ខែតុលា នៅពេលដែលក្រុមសកម្មប្រយុទ្ធបានសម្រុកចូលតាមព្រំដែនយោធាតំបន់ហ្កាហ្សា ដែលបានសម្លាប់មនុស្សប្រហែល ១.២០០នាក់ និងបានចាប់ចំណាប់ថ្នូរ ដែលនៅពេលនេះ១៣៨នាក់ទៀតនៅតែពុំទាន់បានដោះលែងនៅឡើយ។ តំបន់ហ្កាហ្សាដ៏ធំ ត្រូវបានពង្រាបទៅជាវាលរហោស្ថាន។ អង្គការសហប្រជាជាតិនិយាយថាប្រជាជន ប្រហែល៨០ ភាគរយ បានភៀសខ្លួនចេញ ដោយប្រឈមទៅនឹងការខ្វះស្បៀងអាហារ ប្រេងឥន្ធនៈ ទឹក និងថ្នាំពេទ្យ និងការគំរាមកំហែងកាន់តែខ្លាំងឡើងនៃជំងឺផ្សេងៗ។ អគ្គលេខាធិការអង្គការសហប្រជាជាតិលោក Antonio Guterres បានអំពាវនាវឲ្យប្រើប្រាស់មាត្រា៩៩ របស់ធម្មនុញ្ញអង្គការសហប្រជាជាតិដែលកម្រប្រើ ដើម្បីកោះប្រជុំក្រុមប្រឹក្សាសន្តិសុខភ្លាមៗ ដោយអំពាវនាវឱ្យមានបទឈប់បាញ់បន្ទាន់។ លោកបានជំរុញឱ្យមានការដោះលែងចំណាប់ថ្នូរ ប៉ុន្តែបាននិយាយថា អំពើឃោរឃៅដែលប្រព្រឹត្តដោយក្រុមហាម៉ាស មិនអាចបង្ហាញពីភាពត្រឹមត្រូវនៃការដាក់ទណ្ឌកម្មជារួមលើពលរដ្ឋប៉ាឡេស្ទីននោះទេ។ ប៉ុន្តែសហរដ្ឋអាមេរិក ដែលផ្គត់ផ្គង់ជំនួយយោធារាប់ពាន់លានដុល្លារដល់អ៊ីស្រាអែល បានប្រើសិទ្ធវេតូចំពោះសេចក្តីសម្រេចនេះ។