បារាំង ៖ យុវជន៦នាក់ កំពុងបន្តកាត់ទោសដោយបិទទ្វារដែលត្រូវបានចោទប្រកាន់ពីបទជាប់ពាក់ព័ន្ធក្នុងការកាត់ក្បាលគ្រូបង្រៀនប្រវត្តិសាស្ត្រជនជាតិបារាំងម្នាក់លោក Samuel Paty ធ្វើឡើងដោយជនសង្ស័យអ៊ីស្លាមនិយមកាលពីឆ្នាំ២០២០។

គ្រូបង្រៀន បានបង្ហាញរូបតុក្កតាព្យាការី លោក Mohammad ដល់សិស្សរបស់គាត់ នៅក្នុងថ្នាក់រៀន ស្តីពីសេរីភាពនៃការបញ្ចេញមតិ ដែលធ្វើឱ្យឪពុកម្តាយជាជនមូស្លីមមួយចំនួនមានកំហឹង។ ប្រជាជនមូស្លីមជឿថា ការពណ៌នាណាមួយរបស់ព្យាការីគឺជាការប្រមាថ។

អនីតិជនម្នាក់គឺជាក្មេងស្រីអាយុ ១៥ឆ្នាំ ដែលតាមការចោទចោទប្រកាន់ បានប្រាប់ឪពុកម្តាយរបស់នាងថា លោក Paty បានបង្ហាញរូបគំនូរចំអករបស់ព្យាការី នៅក្នុងថ្នាក់រៀនរបស់នាង។ នាងត្រូវបានចោទប្រកាន់ពីបទចោទមិនពិត បន្ទាប់ពីត្រូវបានគេនិយាយថា នាងមិនបាននៅក្នុងថ្នាក់រៀននៅពេលដែលរឿងរ៉ាវកើតឡើង។

លោក Paty អាយុ ៤៧ឆ្នាំ ត្រូវបានសម្លាប់នៅខាងក្រៅសាលារៀនរបស់លោក នៅជាយក្រុងប៉ារីសដោយអ្នកវាយប្រហារមានអាយុ១៨ឆ្នាំ កើតនៅក្នុងប្រទេសរុស្ស៊ីតំបន់ Chechen ដែលត្រូវបានបាញ់សម្លាប់ដោយនគរបាលភ្លាមៗ បន្ទាប់ពីការវាយប្រហារ។ 

អនីតិជន៥នាក់ផ្សេងទៀត ដែលត្រូវបានកាត់ទោស មានអាយុចន្លោះពី១៤ ទៅ១៥ឆ្នាំ នៅពេលនៃការវាយប្រហារឆ្នាំនោះ នឹងត្រូវបានចោទប្រកាន់ពីបទសមគំនិតប្រព្រឹត្តឧក្រិដ្ឋកម្មគិតទុកជាមុន ឬការស្ទាក់វាយប្រហារ។ អនីតិជនទាំង៦នាក់ ត្រូវបានបញ្ជូនទៅតុលាការកុមារ ហើយអាចប្រឈមការជាប់ពន្ធនាគាររយៈពេល២ឆ្នាំកន្លះ។