អង្គការប្រទេសនាំចេញប្រេង(OPEC) កំពុងជួបប្រជុំសមាជិករបស់ខ្លួន និងសម្ព័ន្ធមិត្តផលិតប្រេង ដើម្បីប្រើសិទ្ធវេតូ ចំពោះកិច្ចព្រមព្រៀងដែលបានស្នើឡើងដើម្បីបញ្ឈប់ឥន្ធនៈហ្វូស៊ីល នៅក្នុងកិច្ចប្រជុំកំពូលអាកាសធាតុ COP28 ដោយបង្ហាញពីការបែងចែកដ៏ស៊ីជម្រៅអំពីអនាគតប្រេង និងឧស្ម័ន។

យ៉ាងហោចណាស់មានប្រទេសចំនួន ៨០ កំពុងទាមទារកិច្ចព្រមព្រៀង COP28 ដែលអំពាវនាវឱ្យមានការបញ្ចប់ជាយថាហេតុចំពោះការប្រើប្រាស់ឥន្ធនៈហ្វូស៊ីល ខណៈអ្នកវិទ្យាសាស្ត្រជំរុញឱ្យមានសកម្មភាពប្រកបដោយមហិច្ឆិតា ដើម្បីទប់ស្កាត់ផលប៉ះពាល់ធ្ងន់ធ្ងរបំផុតនៃបម្រែបម្រួលអាកាសធាតុ។

សេចក្តីព្រាងថ្មីនៃអ្វី ដែលអាចជាកិច្ចព្រមព្រៀងចុងក្រោយ COP28 ដែលត្រូវបានចេញផ្សាយកាលពីថ្ងៃសុក្រ បានរួមបញ្ចូលជម្រើសដើម្បីបញ្ចប់ការប្រើប្រាស់ឥន្ធនៈហ្វូស៊ីល។

អគ្គលេខាធិការអង្គការ OPEC លោក Haitham Al Ghais បានសរសេរនៅក្នុងលិខិតមួយ ទៅកាន់សមាជិកក្រុម រួមទាំងកិច្ចប្រជុំកំពូលអាកាសធាតុ COP28 ដែលប្រទេសអារ៉ាប់រួមធ្វើជាម្ចាស់ផ្ទះថា វាហាក់បីដូចជាថា សម្ពាធមិនសមហេតុផល និងជ្រុលហួស ប្រឆាំងឥន្ធនៈហ្វូស៊ីល ដែលអាចឈានដល់ចំណុចកំពូលជាមួយផលវិបាកដែលមិនអាចត្រឡប់មកវិញបាន។

អគ្គលេខាធិការអង្គការ OPEC បាននិយាយនៅក្នុងសេចក្តីថ្លែងការណ៍ថា ពិភពលោក តម្រូវឱ្យមានការវិនិយោគសំខាន់ៗនៅក្នុងថាមពលទាំងអស់ រួមមានទាំងអ៊ីដ្រូកាបូន បច្ចេកវិទ្យាទាំងអស់ និងការយល់ដឹងអំពីតម្រូវការថាមពលរបស់មនុស្ស។ កាលពីពេលមុន ប្រធានកិច្ចប្រជុំ COP28 លោក Sultan al-Jaber បានជំរុញឱ្យគណៈប្រតិភូមកពីប្រទេសជិត២០០ ខិតខំធ្វើការដើម្បីឈានដល់ការឯកភាពគ្នាមុនពេលកិច្ចប្រជុំកំពូលបញ្ចប់តាមផែនការ រយៈពេលពីរសប្តាហ៍នៅថ្ងៃទី ១២ ខែធ្នូ។