អារ៉ាប់ ៖ អារ៉ាប៊ីសាអ៊ូឌីត កំពុងធ្វើដំណោះស្រាយចំពោះបញ្ហាប៉ាឡេស្ទីន ជាលក្ខខណ្ឌមួយសម្រាប់ការចូលរួមណាមួយជាមួយអ៊ីស្រាអែល នៅពេលដែលសហរដ្ឋអាមេរិក ព្យាយាមធ្វើការលើការធ្វើឲ្យមានប្រក្រតីភាព ទំនាក់ទំនងរបស់ពួកគេឡើងវិញ ខណៈដែលសង្រ្គាម កំពុងរាលដាល នៅតំបន់ហ្កាហ្សា ក៏ដោយ។

ព្រះអង្គម្ចាស់ Turki Al-Faisal បានមានព្រះបន្ទូល នៅឯកិច្ចប្រជុំកំពូលមជ្ឈិមបូព៌ា និងអាហ្វ្រិករបស់វិទ្យាស្ថាន Milken នៅទីក្រុងអាប៊ុយដាប៊ី (Abu Dhabi)កាលពីថ្ងៃសុក្រថា៖«បញ្ហាប៉ាឡេស្ទីន គឺនៅចំពោះមុខ ហើយត្រូវតែដោះស្រាយ ជាអាទិភាពនៃការចូលរួមរបស់អារ៉ាប៊ីសាអ៊ូឌីត លើកម្រិតដែលត្រូវបានបង្ហាញ នៅក្នុងកិច្ចប្រជុំនេះ គឺជិតចូលមកដល់ហើយ»។

ជំហរគូសបញ្ជាក់ពីរបៀបដែលសង្គ្រាមរវាងអ៊ីស្រាអែល និងក្រុមហាម៉ាស បានកែប្រែគំនិតផ្នែកទូតសម្រាប់អារ៉ាប៊ីសាអ៊ូឌីត។ មុនពេលជម្លោះផ្ទុះឡើងកាលពីពីរខែមុន ព្រះអង្គម្ចាស់ Mohammed bin Salman បានមានព្រះបន្ទូលថា រាជាណាចក្រនេះ កាន់តែខិតជិត«"ជារៀងរាល់ថ្ងៃ» ទៅនឹងកិច្ចព្រមព្រៀងដ៏សំខាន់មួយ ដែលធ្វើឲ្យមានប្រក្រតីភាពទំនាក់ទំនងជាមួយអ៊ីស្រាអែល ទោះបីជាព្រះអង្គ បានពណ៌នាបញ្ហាប៉ាឡេស្ទីនថា «មានសារៈសំខាន់ខ្លាំងណាស់»ក្តី។

ប៉ុន្តែការពិភាក្សា បានផ្អាក ចាប់តាំងពីការសងសឹករបស់អ៊ីស្រាអែល បន្ទាប់ពីការវាយប្រហាររបស់ក្រុមហាម៉ាស ដែលបានសម្លាប់មនុស្សប្រហែល ១.២០០នាក់។ ការផ្លាស់ប្តូរនៃមនោសញ្ចេតនា បានបង្អាក់សន្ទុះនៃសន្ធិសញ្ញាសន្តិភាពជាបន្តបន្ទាប់ជាមួយអ៊ីស្រាអែល ដែលបានចុះហត្ថលេខាដោយប្រទេសអារ៉ាប់មួយចំនួន ក្នុងឆ្នាំ២០២០ និងសម្របសម្រួលដោយសហរដ្ឋអាមេរិក។