មនុស្សរាប់ម៉ឺននាក់ បាននាំគ្នាដង្ហែក្បួននៅក្នុងទីក្រុងឡុងដ្រ៍ ចក្រភពអង់គ្លេស អំឡុងការតវ៉ាបង្ហាញសាមគ្គីភាពជាមួយប៉ាឡេស្ទីននៅតំបន់ហ្គាហ្សា ។

 កាលពីថ្ងៃសៅរ៍ម្សិលមិញ អ៊ីស្រាអែល បានបញ្ជាឲ្យប្រជាពលរដ្ឋចាកចេញពីតំបន់ភាគកណ្តាលនៃទីក្រុងធំ Khan Younis ស្ថិតក្នុងតំបន់ភាគខាងត្បូងហ្គាហ្សា ហើយនិងបានវាយប្រហារឥតឈប់ឈរលើតំបន់បិទច្រកមួយនេះ ក្រោយពេលដែលសហរដ្ឋអាមេរិកប្រើសិទ្ធិវេតូសេចក្តីសម្រេចរបស់អង្គកាសហប្រជាជាតិទាមទារឲ្យមានបទឈប់បាញ់មនុស្សធម៌បន្ទាន់ ។

 សូមបញ្ជាក់ថា អ៊ីស្រាអែល បានបង្កើនការវាយប្រហាររបស់ខ្លួនទ្វេដងលើតំបន់ហ្គាហ្សាស្ទ្រីប នៅពេញយប់ ខណៈដែលពួកគេបានបង្កើនការវាយប្រហាររបស់ខ្លួនប្រឆាំងនឹងក្រុមហាម៉ាស ។

កងកម្លាំងការពារអ៊ីស្រាអែល បាននិយាយថា ខ្លួនបានវាយប្រហារគោលដៅជាង ៤៥០ នៅតំបន់ហ្គាហ្សាពីជើងគោក សមុទ្រ និងផ្លូវអាកាស ក្នុងរយៈពេល ២៤ម៉ោងចុងក្រោយនេះ ដែលជាចំនួនច្រើនបំផុត ចាប់តាំងពីបទឈប់បាញ់ បានដួលរលំកាលពីសប្តាហ៍មុន ៕