ភ្នំពេញ ៖ បន្ទាប់ពីយុទ្ធនាការចាក់វ៉ាក់សាំងនៅកម្ពុជា មានល្បឿនលឿនហួសផែនការមេ ដែលបានគ្រោងទុក តំណាងអង្គការសុខភាពពិភពលោកប្រចាំកម្ពុជា បានសម្ដែងសុទិដ្ឋិនិយមថា ដំណើរការចាក់វ៉ាក់សាំងនេះ បង្ហាញសញ្ញាវិជ្ជមាន ដែលកម្ពុជា អាចនឹងឈានទៅទប់ស្កាត់ការរីករាលដាលជំងឺកូវីដ-១៩បាន។
លោកស្រី លី អាយលែន តំណាងអង្គការសុខភាពពិភពលោកប្រចាំកម្ពុជា បានបញ្ជាក់ប្រាប់BTV កាលពីម្សិលមិញថា ល្បឿនលឿន នៃយុទ្ធនាការចាក់វ៉ាក់សាំងនៅកម្ពុជា គឺជាសញ្ញាល្អ បង្ហាញថា កម្ពុជាអាចឈានទៅទប់ស្កាត់ការរីករាលដាលជំងឺកូវីដ-១៩បាន ប៉ុន្តែនៅពេលទប់ស្កាត់បាន ប្រជាពលរដ្ឋ មិនត្រូវមានភាពសុទិដ្ឋិនិយមពេកចំពោះវ៉ាក់សាំងនោះទេ ពោលគឺត្រូវបន្តអនុវត្តវិធានការបីកុំ បីការពារ។
ការចាក់វ៉ាក់សាំង គឺជាមធ្យោបាយមួយ ក្នុងចំណោមវិធានសុខាភិបាលចាំបាច់ដទៃទៀត ដែលនឹងបង្ការការរាតត្បាត ការចម្លង និងកាត់បន្ថយផលបះពាល់ នៃជំងឺកូវីដ-១៩ ទៅលើវិស័យសេដ្ឋកិច្ច និងសង្គម ។
របាយការណ៍របស់គណៈកម្មការចំពោះកិច្ចចាក់វ៉ាក់សាំងកូវីដ-១៩ បានបង្ហាញថា គិតចាប់ពីថ្ងៃទី១០ ខែកុម្ភៈ រហូតដល់ថ្ងៃទី១៥ ខែមិថុនា នេះ ពលរដ្ឋកម្ពុជា ចំនួនជាងបីលាន៧ម៉ឺននាក់ហើយ ដែលបាន បានទទួលការចាក់វ៉ាក់សាំងបង្ការជំងឺកូវីដ-១៩ សម្រាប់ដូសទី១ និងចំនួនជាង២លាន៥សែននាក់ បានទទួលការចាក់វ៉ាក់សាំង ដូសទី២៕
អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
