នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា ប្រតិបត្តិការយោធាដ៏ចម្រូងចម្រាសដែលធ្វើឡើងដោយកងកម្លាំងការពារអ៊ីស្រាអែល (IDF) នៅទីក្រុងខាន់ យ៉ូនីស (Khan Younis) ភាគខាងត្បូងនៃតំបន់ហ្កាហ្សា នឹងបន្តរយៈពេលមួយខែទៀត នេះបើយោងតាមសារព័ត៌មាន ឆាណែល-១៣ របស់ប្រទេសនេះបានរាយការណ៍កាលពីថ្ងៃសៅរ៍ (០៩ ធ្នូ)។

ចំនួនអ្នកស្លាប់ពីជុំចុងក្រោយនៃជម្លោះប៉ាឡេស្ទីន និងអ៊ីស្រាអែល បានកើនឡើងលើសពី ១៩.១០០នាក់ នេះបើយោងតាមទិន្នន័យផ្លូវការដែលចេញផ្សាយដោយភាគីទាំងពីរ។

កងកម្លាំងអ៊ីស្រាអែល បានបន្តការទម្លាក់គ្រាប់បែករបស់ពួកគេទៅលើតំបន់ហ្កាហ្សា កាលពីថ្ងៃសៅរ៍ ជាមួយនឹងផ្សែងដ៏ខ្មួលខ្មាញ់បណ្តាលមកពីការទម្លាក់គ្រាប់បែកដ៏ខ្លាំងដែលហុយចេញពីទីក្រុងជាច្រើននៅភាគខាងត្បូងនៃតំបន់ហ្កាហ្សា ដូចជាទីក្រុងព្រំដែន រ៉ាហ្វាហ្វ (Rafah) និងទីក្រុងខាន់ យ៉ូនីស (Khan Younis) ជាដើម។

នៅថ្ងៃដដែលនោះ យោធាអ៊ីស្រាអែលបានបញ្ចេញវីដេអូរបស់ទាហានអ៊ីស្រាអែល ដែលកំពុងប្រយុទ្ធនឹងក្រុមហាម៉ាសនៅជំរំជនភៀសខ្លួន ចាបាលីយ៉ា (Jabalia) ភាគខាងជើងហ្កាហ្សា ហើយបាននិយាយនៅក្នុងសេចក្តីថ្លែងការណ៍ថាទាហានរបស់ខ្លួនបានបើកការវាយប្រហារលើអគារដែលកាន់កាប់ដោយពួកសកម្មប្រយុទ្ធហាម៉ាស និងបានសម្លាប់មនុស្សមួយចំនួន។

កាលពីថ្ងៃសៅរ៍ផងដែរ កងពលតូច អាល់កាសាម (Al-Qassam) ដែលជាស្លាបប្រដាប់អាវុធនៃក្រុមហាម៉ាស បានបញ្ចេញវីដេអូនៃយុទ្ធជនរបស់ខ្លួន ដែលកំពុងប្រយុទ្ធគ្នាជាមួយយោធាអ៊ីស្រាអែល និងបើកការវាយប្រហារលើរថយន្តយោធា និងទាហានអ៊ីស្រាអែលជាច្រើន៕