កោះកុង៖ ប្រជាកសិកររស់នៅភូមិជីត្រេះ ឃុំអណ្តូងទឹក ស្រុកបូទុមសាគរ អះអាងថា ការលក់ផ្លែត្រសក់ផ្អែមរបស់ពួកគាត់បានថ្លៃជាងឆ្នាំទៅ ដោយក្នុង១គីឡូក្រាមថ្លៃ៥០០០រៀល បន្ទាប់ពីមានបទពិសោធន៍បង្កបង្កើនផលប្រមាណជា៤ឆ្នាំមកនេះ។

លោកស្រី ឡាយ រ៉ន តំណាងកសិករម្នាក់ដែលជោគជ័យលើការដាំដុះផ្លែត្រសក់ផ្អែមឡើងរសៀលថ្ងៃទី១០ ខែធ្នូ ឆ្នាំ២០២៣ថា ឆ្នាំនេះ លោកស្រីនិងក្រុមគ្រួសារ បានដាំដុះផ្លែត្រសក់ផ្អែមរហូតដល់ទៅ១៧.០០០កូន គឺច្រើនជាងឆ្នាំមុន ខណៈបច្ចុប្បន្នលក់អស់៣៨២ផ្លែ ដោយក្នុង១ផ្លែលោកស្រីលក់តម្លៃ៥០០០រៀល បើធៀបនឹងឆ្នាំ២០២២ លក់១គីឡូក្រាមថ្លៃ ៤០០០រៀល។

លោកស្រី ឡាយ រ៉ន បន្ថែមថា លោកស្រី ផ្តើមប្រមូលផលផ្លែត្រសក់ផ្អែមនេះ ថ្ងៃទី៦ ដល់ថ្ងៃទី២៦ ខែធ្នូ ខាងមុខ ហើយសព្វថ្ងៃកំពុងលក់ឈ្នូញលក្នុងស្រុកទៅតំបន់កូនកុក ឃុំភ្ញីមាស ស្រុកគិរីសាគរ និងលក់ទៅបណ្តាខេត្ត ដឹកម៉ូយខ្លះ ព្រមទាំងមានគេមកប្រមូលទិញដល់កន្លែងខ្លះ។

លោកស្រី ឡាយ រ៉ន លើកឡើងទៀតថា លោកស្រីពុំទាន់បានទំនាក់ទំនងលក់ចេញទេ ព្រោះត្រសក់ផ្អែម ១៧០០កូននេះ លោកស្រីផ្គត់ផ្គង់ក្នុងខេត្តពុំទាន់គ្រប់គ្រាន់ឡើយ។ ដំណាំត្រសក់ផ្អែមជាចរន្តសេដ្ឋកិច្ចគ្រួសារលោកស្រីដើម្បីចិញ្ខឹមកូនលោកស្រីចំនួន ៥នាក់ អោយបន្តរការសិក្សាពីថ្នាក់បឋមរហូតដល់មហាវិទ្យាល័យ។

ថ្មីៗនេះ លោកស្រី អ៊ី នារីនេត អភិបាលរងខេត្តកោះកុង បានពិនិត្យមើលការប្រមូលផ្លែត្រសក់ផ្អែមរបស់លោកស្រី ឡាយ រ៉ន ក្រោយមកលោកស្រី អភិបាលរងខេត្ត ក៏វាយតម្លៃខ្ពស់ពីគុណភាពរសជាតិផ្លែត្រសក់ផ្អែមឆ្ងាញ់ដែលដាំដោយកសិករក្នុងមូលដ្ឋាន។

លោកស្រី អ៊ី នារីនេត ក៏បានប្រសិទ្ធនាមថា ផ្លែត្រសក់ផ្អែមនេះ ជាត្រសក់ផ្អែមទឹកឃ្មុំ អោយសាកសមនឹងរសជាតិ។ លោកស្រីអភិបាលរងខេត្ត ថ្លែងអំណអរគុណដល់គម្រោងស្ទៀរSteer របស់អង្គការសង្គ្រោះកុមារ Save The Children ដែលបានចុះជួយផ្តល់បច្ចេកទេស និងរៀបចំផែនការផលិតដល់កសិករបានយ៉ាងច្បាស់លាស់ មិនតែប៉ុណ្ណោះគម្រោងថែមទាំងបានផ្សាភ្ជាប់ទីផ្សាជូនកសិករទៀតផង។

គួរកត់សម្គាល់ថា ក្រោមកិច្ចសម្របសម្រួលរបស់លោក ក្រូច បូរីសីហា អភិបាលស្រុកបូទុមសាគរ និងអង្គដៃគូអភិវឌ្ឍន៍វិស័យកសិកម្ម ក្រៅពីកសិករដាំដុះត្រសក់ផ្អែម ក៏មានដែលកសិករបង្កបង្កើនផលឪឡឹកលឿង និងខាត់ណាផ្កាជាដើម ដោយគេសង្កេតឃើញមានកសិករប្រមាណ ១០គ្រួសារកំពុងតែដាំដំណាំទាំងអស់នេះជាច្រើនហិកតា ស្ថិតនៅក្នុងមូលដ្ឋានស្រុកបូទុមសាគរ៕ អត្តបទៈឈឹម មករា