ក្តីសុបិនចង់ធ្វើឱ្យជីវិតប្រសើរឡើងនៅក្នុងប្រទេសកាណាដា កំពុងក្លាយជាសមរភូមិដើម្បីរស់រានមានជីវិតសម្រាប់ជនអន្តោប្រវេសន៍ជាច្រើន ដោយសារតែតម្លៃនៃការចំណាយក្នុងការរស់នៅប្រចាំថ្ងៃកើនឡើងខ្ពស់ខ្លាំង និងកង្វះការជួល ដែលបង្ខំឱ្យអ្នកចំណូលថ្មីមួយចំនួនងាកចេញពីប្រទេសដែលពួកគេជ្រើសរើសធ្វើជាផ្ទះថ្មីមួយនេះ។

សម្រាប់ប្រទេសមួយដែលសាងសង់ដោយពឹងផ្អែកលើជនអន្តោប្រវេសន៍ ទំនោរកើនឡើងនៃមនុស្សដែលចាកចេញពីប្រទេសកាណាដា បង្កហានិភ័យធ្វើឱ្យខូចដល់គោលនយោបាយហត្ថលេខារបស់នាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau) ដែលបានផ្តល់សិទ្ធិស្នាក់នៅអចិន្ត្រៃយ៍ដល់មនុស្សចំនួន ២,៥លាននាក់ ក្នុងរយៈពេលត្រឹមតែ ៨ឆ្នាំប៉ុណ្ណោះ។

លោក ទ្រូដូ បានធ្វើឲ្យអន្តោប្រវេសន៍ ក្លាយជាអាវុធសំខាន់របស់ខ្លួនដើម្បីដោះស្រាយបញ្ហាប្រឈមដ៏ធំរបស់ប្រទេសកាណាដា នៃប្រជាជនចាស់ច្រើន និងកំណើនចំនួនប្រជាជនយឺត ហើយវាក៏បានជួយជំរុញកំណើនសេដ្ឋកិច្ចផងដែរ។ ស្ថិតិកាណាដាបានបង្ហាញថា អន្តោប្រវេសន៍បានជំរុញឱ្យចំនួនប្រជាជនកាណាដា កើនឡើងក្នុងល្បឿនដ៏លឿនបំផុតរបស់ខ្លួនក្នុងរយៈពេលជាងប្រាំមួយទសវត្សរ៍នៅឆ្នាំនេះ។

ប៉ុន្តែឥឡូវនេះ ការបញ្ច្រាសនៃទំនោរនោះកំពុងកើតឡើងជាបណ្តើរៗ នេះបើយោងតាមវិទ្យាស្ថានសញ្ជាតិកាណាដា។ ក្នុងរយៈពេលប្រាំមួយខែដំបូងនៃឆ្នាំ២០២៣នេះ មនុស្សប្រហែល ៤២.០០០នាក់ បានចាកចេញពីប្រទេសកាណាដា ហើយទិន្នន័យផ្លូវការបានបង្ហាញថាតួលេខនេះកើនឡើងជិត ៨.០០០នាក់ បើធៀបនឹងឆមាសទីមួយនៃឆ្នាំ២០២១៕