ក្រុមហាម៉ាស បានព្រមានកាលពីថ្ងៃអាទិត្យថា គ្មានចំណាប់ថ្នូរ​ណាម្នាក់នឹ​ង​ចាក​ចេញ​ពី​តំបន់​ហ្កាហ្សា​ដោយ​នៅរស់ឡើយ លុះត្រាតែការទាមទាររបស់ខ្លួនសម្រាប់ការដោះលែងអ្នកទោស ត្រូវ​បានបំពេញ ខណៈអង្គការសុខភាពពិភពលោក បាននិយាយថា ប្រព័ន្ធសុខភាពរបស់ដែនដីនេះ កំពុង​ដួលរលំបន្ទាប់ពីសង្គ្រាមមានរយៈពេលជាងពីរខែ។ យោងតាមតួលេខរបស់អ៊ីស្រាអែល បាន​ឲ្យដឹងថា ក្រុមហាម៉ាស បានបង្ក​ជម្លោះ​ដោយ​ការ​វាយ​ប្រហារ​ដ៏​ឃោឃៅ​បំផុត​ទៅ​លើ​អ៊ីស្រាអែល​កាល​ពីថ្ងៃទី៧ ខែតុលា បណ្តាលឲ្យមនុស្សប្រហែល ១.២០០នាក់ស្លាប់ ហើយបាន​ចាប់​ចំណាប់​ថ្នូរ​ប្រហែល ២៤០នាក់ ត្រឡប់ទៅកាន់តំបន់ហ្កាហ្សា។

យោង​តាម​ក្រសួង​សុខាភិបាល​ដែល​គ្រប់​គ្រង​ដោយ​ក្រុមហាម៉ាស បានឲ្យដឹងថា អ៊ីស្រាអែល បាន​ឆ្លើយ​តប​ដោយការវាយលុកដោយយោធាឥតឈប់ឈរ ដែលបានពង្រាប​តំបន់​ហ្កាហ្សា​ភាគ​ច្រើន​ឱ្យ​ទៅ​ជាកម្ទេចកម្ទី និងបានសម្លាប់មនុស្សយ៉ាងហោចណាស់ ១៧.៩៩៧ នាក់ ភាគច្រើនជាស្ត្រី និងកុមារ។ ខណៈ ក្រុមផ្តល់ជំនួយព្រមានថា ដែនដីនេះស្ថិត​នៅ​លើ​មាត់​ជ្រោះ​នៃ​ការ​គ្រប​ដណ្តប់​ដោយ​ជំងឺ និងភាពអត់ឃ្លាន ប្រមុខអង្គការសហប្រជាជាតិ បានរិះគន់ក្រុម​ប្រឹក្សា​សន្តិសុខ​ដែល​ខ្វែង​គំនិតគ្នា និងភាពជាប់គាំង ចំពោះការខកខានមិនបានឈានដល់បទឈប់បាញ់។

ប្រធាន​អង្គការសុខភាពពិភពលោក លោក Tedros Adhanom Ghebreyesus បាននិយាយថា ប្រព័ន្ធ​សុខភាពនៅតំបន់ហ្កាហ្សា កំពុងធ្លាក់ចុះនិងដួលរលំ ដោយ​មាន​តែ​មន្ទីរ​ពេទ្យ​ចំនួន​១៤​កន្លែង ក្នុងចំណោម៣៦កន្លែង ដែលដំណើរការនៅគ្រប់សមត្ថភាព។ ក្រុមប្រឹក្សាប្រតិបត្តិរបស់អង្គការសុខភាពពិភពលោក (WHO) កាលពីថ្ងៃអាទិត្យ បាន​អនុម័ត​សេចក្តី​សម្រេចមួយ ដោយអំពាវនាវឱ្យមានការផ្តល់ជំនួយភ្លាមៗ និងគ្មានការរារាំង។ អង្គការ​សហប្រជាជាតិ បានប៉ាន់ប្រមាណថាពលរដ្ឋ ១,៩ លាននាក់ ក្នុងចំណោមប្រជាជន ២,៤ លាន​នាក់​នៅ​ហ្កាហ្សា បានជម្លៀសខ្ឡយនចេញ ដែលប្រហែលពាក់កណ្តាលក្នុងចំនោមនេះគឺជាកុមារ ហើយ​មនុស្សជាច្រើនត្រូវបានបានបង្ខំឱ្យទៅកាន់ភាគខាងត្បូង និងអស់​កន្លែង​សុវត្ថិ​ភាព​ដើម្បី​ទៅ​ជ្រក​កោន​៕