នាយករដ្ឋមន្ត្រីកាតា លោក ស៊ែក ម៉ូហាមេដ អាល់ថានី (Sheikh Mohammed Al Thani) បាន​និយាយកាលពីថ្ងៃអាទិត្យ (១០ ធ្នូ) ថា មនុស្ស​គ្រប់​ជំនាន់​នៅ​មជ្ឈិម​បូព៌ា​កំពុង​មាន​ហានិភ័យ​ក្នុង​ការ​ក្លាយ​អ្នកគាំទ្រភាពជ្រុលនិយមដោយសារតែសង្គ្រាមនៅតំបន់ហ្កាហ្សា។

លោក អាល់ថានី បានប្រាប់វេទិការប្រមូលផ្តុំនៃកិច្ចប្រជុំមួយថា រដ្ឋធានីដូហា នឹងបន្ត​ដា​ក់​សម្ពាធ​លើ​អ៊ីស្រាអែល និងក្រុមហាម៉ាស ឱ្យមានបទឈប់បាញ់ បើទោះបីជាមានឱកាស «តិចតួច» ក៏​ដោយ។ ប្រទេសកាតា ជាទីដែលមេដឹកនាំនយោបាយជាច្រើននៃក្រុមហាម៉ាសមានមូលដ្ឋាន បាន​ដឹក​នាំ​ការ​ចរចារវាងក្រុមសកម្មប្រយុទ្ធមួយនេះ និងអ៊ីស្រាអែល។

លោក ស៊ែក ម៉ូហាមេដ បាននិយាយថា ចំណាប់ថ្នូរត្រូវបានដោះលែងពីតំបន់ហ្កាហ្សា ដោយ​សារ​តែ​ការ​ចរចា និងមិនមែនដោយសារតែសកម្មភាពយោធារបស់អ៊ីស្រាអែលនោះទេ។ ប្រមុខអង្គការ UNRWA ដែលជាទីភ្នាក់ងារជំនួយរបស់អង្គការសហប្រជាជាតិសម្រាប់ប៉ាឡេស្ទីន បាន​និយាយ​ថា ការបន្ទាបបន្ថោកប្រជាជនប៉ាឡេស្ទីន បាន​អនុញ្ញាត​ឱ្យ​សហគមន៍​អន្តរជាតិ​អត់​ធ្មត់​ចំពោះ​ការ​វាយ​ប្រហារ​បន្តរបស់អ៊ីស្រាអែល លើតំបន់ហ្កាហ្សា។

សហរដ្ឋអាមេរិក និងអ៊ីស្រាអែល ប្រឆាំងនឹងបទឈប់បាញ់ ព្រោះពួកគេជឿថា​វា​នឹង​ផ្តល់​ប្រយោជន៍​​ដល់​ក្រុមហាម៉ាសប៉ុណ្ណោះ។ ជំនួសមកវិញ ទីក្រុងវ៉ាស៊ីនតោន គាំទ្រការផ្អាក​ប្រយុទ្ធ​ដើម្បី​ការពារ​ជនស៊ីវិល និង​អនុញ្ញាត​ឱ្យ​មាន​ការ​ដោះលែង​ចំណាប់​ថ្នូរ​ដែល​ត្រូវ​បាន​ចាប់​ខ្លួន​ដោយ​ក្រុម​ហាម៉ាស នៅក្នុងការវាយប្រហារដ៏បង្ហូរឈាមកាលពីថ្ងៃទី០៧ ខែតុលា លើអ៊ីស្រាអែល៕