ភ្នំពេញ ៖លោកជំទាវសាស្រ្តាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល បានជំរុញ និងរំឮកមន្រ្ដីគិលានុបដ្ឋាក និងឆ្មបទាំងអស់ត្រូវប្រកាន់ភ្ជាប់នូវក្រមសីលធម៌វិជ្ជាជីវៈជាគ្រូពេទ្យ និងត្រូវគិតពីអាយុជីវិតរបស់អ្នកជំងឺជាកត្តាចាំបាច់បំផុត រាល់ពេលដែលអ្នកជំងឺទាំងឡាយមករកការពិគ្រោះព្យាបាល និងសង្គ្រោះជាបន្ទាន់។

​លោកជំទាវសាស្រ្តាចារ្យ អ៊ឹម សិទ្ធិការ្យ បានជំរុញបែបនេះក្នុងឱកាសអញ្ជើញបើកសិក្ខាសាលាស្តីពីការលើកកម្ពស់គុណភាពថែទាំ និងសុវតិ្ថភាពរបស់អ្នកជំងឺតាមរយៈពង្រឹងប្រព័ន្ធគ្រប់គ្រងការបង្ការ និងត្រួតពិនិត្យការចម្លងរោគ ថ្ងៃទី១១-១២ ខែធ្នូ ឆ្នាំ ២០២៣ ជាមួយសិក្ខាកាម ចំនួន ១១១ នាក់មកពីតាមមន្ទីរពេទ្យ និងមណ្ឌល សុខភាពក្នុង ២៥ រាជធានីខេត្ត នៅសណ្ឋាគារទន្លេបាសាក់២ រាជធានីភ្នំពេញ។

លោកជំទាវមានប្រសាសន៍ថា គិលានុបដ្ឋាក និងឆ្មបបានដើតួនាទីយ៉ាងសំខាន់ ក្នុងភារកិច្ច ការពារសុខភាព ការលើកកម្ពស់សុខភាព ការបង្ការជំងឺ និងគ្រោះថ្នាក់ កាត់បន្ថយការឈឺចាប់តាមរយៈការព្យាបាល និង ការជួយផ្តល់ប្រឹក្សាចំពោះអ្នកជំងឺ។  

លោកជំទាវបានឱ្យដឹងថាក្នុងឆ្នាំ២០២៣ គិលានុបដ្ឋាក និងឆ្មបមានប្រមាណ ៦០% បើប្រៀបធៀបទៅនឹងធនធានសុខាភិបាលទាំងមូល។ ហើយទិសដៅយុទ្ធសាស្ត្ររបស់គិលានុបដ្ឋាក និងឆ្មបក្នុងការកម្ពស់គុណភាពថែទាំ និងសុវតិ្ថភាពរបស់អ្នកជំងឺ ២០២៤ខាមុខ គឺការអនុវត្តដោយផ្អែកលើភស្តុតាង និងគោលនយោបាយអាទិភាពដែលអាចធានាបាននូវការអនុវត្តរបស់គិលានុបដ្ឋាក និងឆ្មប ដើម្បីរួមចំណែកធ្វើឱ្យកាន់តែប្រសើឡើងក្នុងការសម្រេចបាននូវការគ្របដណ្តប់សុខភាពជាសកល និងគោលដៅសុខភាពប្រជាពលរដ្ឋផ្សេងៗទៀត។ 

លោកជំទាវស្នើឱ្យមានការពិនិត្យមើលពីចំណុចដែលបានអនុវត្តល្អកន្លងមក និងស្វែងរកចំណុចដែលត្រូវកែលម្អរ ដើម្បីអនុវត្តឱ្យមានប្រសិទ្ធភាពរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាលនៃព្រះរាជាណាចក្រកម្ពុជា ក្នុងការលើកកម្ពស់សុខុមាលភាព របស់ប្រជាពលរដ្ឋកម្ពុជាសំដៅឈានទៅសម្រេចបាននូវការគ្របដណ្តប់សុខភាពជាសកលស្រប តាមផែន ការយុទ្ធសាស្រ្តបញ្ចកោណនៃរាជរដ្ឋាភិបាលអាណត្តិទី៧៕  ដោយ ៖ ភារម្យ