ក្រសួងការបរទេសហ្វីលិពីន នៅថ្ងៃចន្ទ (ទី១១ ខែធ្នូ) នេះ បានឲ្យដឹងថា ប្រទេសហ្វីលីពីនបានកោះហៅបេសកជនរបស់ប្រទេសចិន បន្ទាប់ពីមានការប្រឈមមុខដាក់គ្នារយៈពេល ២ថ្ងៃ រវាងនាវារបស់ប្រទេសទាំង២ នៅក្នុងសមុទ្រចិនខាងត្បូង ដែលមានជម្លោះ។

វីដេអូដែលចេញផ្សាយដោយឆ្មាំល្បាតឆ្នេរសមុទ្រហ្វីលីពីន បានបង្ហាញឲ្យឃើញនាវាចិន ប្រើកាណុងបាញ់បាញ់ទឹកដាក់នាវាហ្វីលីពីន ក្នុងអំឡុងពេលបេសកកម្មផ្ដល់សម្ភារផ្គត់ផ្គង់ពីរដាច់ដោយឡែកពីគ្នាទៅកាន់តំបន់ថ្មប៉ប្រះទឹក Scarborough Shoal និងតំបន់ថ្មប៉ប្រះទឹក Second Thomas Shoal កាលពីថ្ងៃសៅរ៍ និងថ្ងៃអាទិត្យ។ ការប៉ះទង្គិចគ្នាក៏កើតមានផងដែរ រវាងទូកហ្វីលីពីន និងចិន នៅឯតំបន់ថ្មប៉ប្រះទឹក Second Thomas Shoal ដោយប្រទេសទាំង២ បានទម្លាក់កំហុសដាក់គ្នាទៅវិញទៅមកថា បានធ្វើឲ្យមានឧបទ្ទវហេតុនេះ។

អ្នកនាំពាក្យក្រសួងការបរទេសលោកស្រី Teresita Daza បានប្រាប់សន្និសីទសារព័ត៌មាន នៅថ្ងៃចន្ទនេះថា ការតវ៉ាផ្នែកការទូតត្រូវបានធ្វើឡើង ហើយ «ឯកអគ្គរដ្ឋទូតចិនក៏ត្រូវបានកោះអញ្ជើញផងដែរ»។ ជាមួយគ្នានេះ លោកស្រី Daza បានប្រាប់ថា ការប្រកាសដែលថា ឯកអគ្គរដ្ឋទូតចិន លោក Huang Xilian ជា «បុគ្គលដែលមិនត្រូវការ» នៅក្នុងប្រទេសហ្វីលីពីន ក៏ជា «អ្វីដែលត្រូវយកមកពិចារណាយ៉ាងល្អិតល្អន់ផងដែរ»។

គួរបញ្ជាក់ដែរថា ប្រទេសចិនទាមទារស្ទើរតែទាំងស្រុងនូវសមុទ្រចិនខាងត្បូង ដោយក្នុងនោះរួមទាំងដែនទឹក និងកោះនៅក្បែរដែនសមុទ្រនៃប្រទេសជិតខាងរបស់ខ្លួន ហើយប្រទេសមហាអំណាចសេដ្ឋកិច្ចមួយនេះ បានព្រងើយកន្តើយនឹងសេចក្តីសម្រេចរបស់តុលាការអន្តរជាតិ ដែលថា ការអះអាងរបស់ខ្លួន មិនមានមូលដ្ឋានផ្លូវច្បាប់។

ក្រុមអ្នកវិភាគបាននិយាយថា ការប្រឈមមុខដាក់គ្នានៅតំបន់ថ្មប៉ប្រះទឹក Scarborough Shoal និងតំបន់ថ្មប៉ប្រះទឹក Second Thomas Shoal គឺជាភាពតានតឹងបំផុត រវាងនាវាហ្វីលីពីន និងចិនក្នុងរយៈពេលប៉ុន្មានឆ្នាំមកនេះ ខណៈប្រទេសទាំង២ នេះ ព្យាយាមអះអាងការទាមទារដែនសមុទ្រ ដែលមានជម្លោះរបស់ពួកគេ៕