នាយកប្រតិបត្តិក្រុមហ៊ុន Nvidia របស់សហរដ្ឋអាមេរិក បាននិយាយនៅថ្ងៃចន្ទ (ទី១១ ខែធ្នូ) នេះ ថា ក្រុមហ៊ុននឹងពង្រីកភាពជាដៃគូជាមួយក្រុមហ៊ុនបច្ចេកវិទ្យាធំៗរបស់វៀតណាម និងគាំទ្រប្រទេសអាស៊ីអាគ្នេយ៍មួយនេះ ក្នុងការបណ្តុះបណ្តាលជំនាញ សម្រាប់ការអភិវឌ្ឍបញ្ញាសិប្បនិម្មិត (AI) និងហេដ្ឋារចនាសម្ព័ន្ធឌីជីថល។

ក្រុមហ៊ុន Nvidia ដែលបានបណ្តាក់ទុនរួចហើយចំនួន ២៥០លានដុល្លារ ក្នុងប្រទេសវៀតណាម រហូតមកដល់ពេលនេះ បានចាប់ដៃគូជាមួយក្រុមហ៊ុនបច្ចេកវិទ្យាឈានមុខគេ ក្នុងការដំឡើង AI នៅក្នុងឧស្សាហកម្មផ្ទុកទិន្នន័យ រថយន្ត និងថែទាំសុខភាព។ នេះបើយោងតាមឯកសារដែលបានបោះពុម្ពផ្សាយដោយសេតវិមាន កាលពីខែកញ្ញា នៅពេលដែលទីក្រុងវ៉ាស៊ីនតោនធ្វើឲ្យប្រសើរឡើងនូវទំនាក់ទំនងការទូតជាមួយវៀតណាម។

នៅឯព្រឹត្តិការណ៍ នាទីក្រុងហាណូយ ក្នុងដំណើរទស្សនកិច្ចលើកដំបូងរបស់លោកទៅកាន់ប្រទេសនេះនាយកប្រតិបត្តិក្រុមហ៊ុន Nvdia លោក Jensen Huang បាននិយាយថា៖ «វៀតណាមគឺជាដៃគូរបស់យើងរួចទៅហើយ ដោយសារយើងមានអតិថិជនរាប់លាននាក់នៅទីនេះ។ វៀតណាម និងក្រុមហ៊ុន Nvidia នឹងធ្វើឲ្យទំនាក់ទំនងរបស់យើងកាន់តែស៊ីជម្រៅ ដោយក្រុមហ៊ុន Viettel, FPT, Vingroup, VNG គឺជាដៃគូ ដែលក្រុមហ៊ុន Nvidia សម្លឹងមើល ដើម្បីពង្រីកភាពជាដៃគូជាមួយ»។

សារព័ត៌មាន Reuters បានរាយការណ៍ កាលពីថ្ងៃសុក្រ (ទី៨ ខែធ្នូ) ថា ក្រុមហ៊ុន Nvidia ត្រៀមពិភាក្សាអំពីកិច្ចព្រមព្រៀងសហប្រតិបត្តិការលើឧបករណ៍បន្ទះអេឡិចត្រូនិកជាមួយបណ្ដាក្រុមហ៊ុនបច្ចេកវិទ្យា និងអាជ្ញាធរវៀតណាម នៅក្នុងកិច្ចប្រជុំមួយ នៅថ្ងៃចន្ទនេះ៕