ក្រសួងការពារជាតិរបស់ប្រទេសនេះ បាននិយាយថា ចក្រភពអង់គ្លេស នឹងផ្គត់ផ្គង់នាវារាវរកមីនប្រភេទ Sanddown ចំនួនពីរគ្រឿង ដល់អ៊ុយក្រែន។

ក្រសួងនេះ បានជូនដំណឹងថា៖«រដ្ឋមន្ត្រីការពារជាតិ លោក Grant Shapps នឹងប្រកាសពីការទិញនាវាប្រឆាំងគ្រាប់មីន Sandown Class (MCMVs) ចំនួនពីរគ្រឿងដោយប្រទេសអ៊ុយក្រែន តាមរយៈក្រុមហ៊ុន UK Export Finance នៅថ្ងៃនេះ នៅក្នុងទីក្រុងឡុងដ៍»។

ក្រសួង បានបញ្ជាក់ថា ចក្រភពអង់គ្លេស រួមជាមួយប្រទេសន័រវែស នឹងបង្កើតក្រុមចម្រុះដែនសមុទ្រថ្មីមួយ ដើម្បីបញ្ចូលប្រទេស ដែលចង់ផ្តល់ជំនួយផ្នែកជើងទឹក ដល់អ៊ុយក្រែន។

ក្រសួងបានឲ្យដឹងទៀតថា៖ «ក្រុមចម្រុះដែនសមុទ្រថ្មី នឹងធ្វើការយ៉ាងជិតស្និទ្ធជាមួយកងទ័ពជើងទឹកអ៊ុយក្រែន និងក្រសួងការពារជាតិ ដើម្បីអភិវឌ្ឍន៍សមត្ថភាពមួយចំនួន រួមទាំងការអភិវឌ្ឍយ៉ាងឆាប់រហ័សនៃកងកម្លាំងដែនសមុទ្រនៅសមុទ្រខ្មៅ បន្តអភិវឌ្ឍន៍កងម៉ារីនអ៊ុយក្រែន និងនាវាល្បាត ដើម្បីការពារផ្លូវទឹកតាមឆ្នេរ និងនៅឆ្ងាយពីសមុទ្រ»។