ការបោះឆ្នោតសម្រាប់ការជ្រើសរើសប្រធានាធិបតីអេហ្ស៊ីបឆ្នាំ២០២៤ បានចាប់ផ្តើមហើយនៅវេលាម៉ោង ៩:០០ ម៉ោងក្នុងស្រុក (ត្រូវនឹងម៉ោង ៧:០០ ម៉ោងសកល) កាលពីថ្ងៃអាទិត្យ (ទី១០ ខែធ្នូ) នៅទូទាំងប្រទេស ដោយមានបេក្ខជនចំនួន ៤រូប ប្រកួតប្រជែងដណ្តើមតំណែងប្រធានាធិបតី ក្នុងនោះរួមទាំងប្រធានាធិបតីដែលកំពុងកាន់អំណាច លោក Abdel-Fattah al-Sisi ផងដែរ។

ការិយាល័យបោះឆ្នោតជាង ៩.០០០កន្លែង នៅទូទាំងប្រទេស នឹងបើករយៈពេល ១២ម៉ោង ក្នុងមួយថ្ងៃរហូតដល់ថ្ងៃអង្គារ (ទី១២ ខែធ្នូ) ដើម្បីឲ្យអ្នកដែលមានសិទ្ធិបោះឆ្នោតប្រហែល ៦៧លាននាក់ទម្លាក់សន្លឹកឆ្នោតរបស់ខ្លួនទៅក្នុងធុងឆ្នោត បន្ទាប់ពីការបោះឆ្នោតនៅក្រៅប្រទេស បានបញ្ចប់នៅថ្ងៃទី៣ ខែធ្នូ។

លោក Sisi ដែលកំពុងឈរឈ្មោះសម្រាប់អាណត្តិទី៣ ជាប់ៗគ្នា បានឈ្នះការបោះឆ្នោតទាំង ២លើក ជាមួយនឹងសំឡេងភាគច្រើនលើសលប់ នៅក្នុងឆ្នាំ២០១៤ និងឆ្នាំ២០១៨។ បេក្ខជន ៣រូបផ្សេងទៀត គឺលោក Farid Zahran របស់គណបក្សសង្គមប្រជាធិបតេយ្យ លោក Abdel Sanad Yamama របស់គណបក្ស Al-Wafd អេហ្ស៊ីប និងបេក្ខជនគណបក្សសាធារណរដ្ឋប្រជាមានិត លោក Hazem Omar។

អាជ្ញាធរជាតិរៀបចំការបោះឆ្នោត (NEA) របស់ប្រទេសអេហ្ស៊ីប បាននិយាយថា ដំណើរការបោះឆ្នោតនេះ កំពុងត្រូវបានត្រួតពិនិត្យ ដោយចៅក្រមអេហ្ស៊ីបចំនួន ១៥.០០០នាក់ រួមជាមួយអ្នកសង្កេតការណ៍ក្នុងស្រុក និងក្រៅស្រុករាប់ពាន់នាក់ទៀត។

គេរំពឹងថា NEA នឹងប្រកាសអ្នកឈ្នះតែម្ដង នៅថ្ងៃទី១៨ ខែធ្នូ ប្រសិនបើបេក្ខជនទទួលបានសំឡេងភាគច្រើនដាច់ខាត នៅក្នុងការបោះឆ្នោតជុំទី១ ដោយមិនចាំបាច់ធ្វើការបោះឆ្នោតជុំទី២។ តែបើការប្រកួតប្រជែងឈានដល់ការបោះឆ្នោតជុំទី២ លទ្ធផលចុងក្រោយ អាចនឹងត្រូវប្រកាសយ៉ាងយូរនៅថ្ងៃទី១៦ ខែមករា។ នេះបើតាម NEA៕