តាកែវ ៖ នៅថ្ងៃទី១១ ខែធ្នូ បណ្តាអ្នកសារព័ត៌មាន បាននាំគ្នាចុះទៅពិនិត្យមើលផ្ទាល់ការឈូសឆាយផ្លូវនៅតំបន់ព្រៃអភិរក្សសួនសត្វភ្នំតាម៉ៅ ខេត្តតាកែវ។ បើតាម អ្នកនាំពាក្យក្រសួងកសិកម្ម បានអះអាងថា ការឈូសឆាយផ្លូវនោះគឺធ្វើឡើងដើម្បីបង្ការភ្លើងឆេះព្រៃ មិនខុសច្បាប់ និងមិនមានគម្រោងវិនិយោគអភិវឌ្ឍន៍ ដូចការចោទរបស់អង្គការ Wild Life Alliance និងកាសែតបរទេស១បានផ្សាយថា ជាការបំផ្លាញធនធានព្រៃឈើភ្នំតាម៉ៅនោះទេ។

​លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានថ្លែងថា ការឈូសឆាយតាមផ្លូវចាស់ៗ នៅតាមព្រំប្រទល់ដីព្រៃឧទ្យានអភិរក្សសួនសត្វភ្នំតាម៉ៅជាប់នឹងដីឯកជនប្រវែងជាងមួយគីឡូម៉ែត្រ គឺធ្វើឡើងដើម្បីបង្ការភ្លើងឆេះព្រៃដែលធ្លាប់កើតមានសើ្ទររៀងរាល់ឆ្នាំ និងផ្តល់ជាមធ្យោបាយឲ្យធ្វើដំណើរបានស្រួលជូនពលរដ្ឋផងដែរ ហើយក្រសួងផ្ទាល់នឹងនៅតែធ្វើផ្លូវបង្ការភ្លើងឆេះព្រៃនោះបន្តទៀត ដើម្បីធានាបានការពារភ្លើងឆេះព្រៃ ដែលពិបាកពន្លត់នោះ ជាពិសេសនៅពេលរដូវក្តៅឈានចូលមកដល់នេះ។

តាមការបញ្ជាក់ពីលោក ញឹក រតនៈពេជ្រ ប្រធានឧទ្យានសួនសត្វព្រៃការពារ និងភូតគាមភ្នំតាម៉ៅ ថ្លែងថា ជាក់ស្តែង នៅបច្ចុប្បន្ន នៅក្នុងតំបន់ព្រៃអភិរក្សសួនសត្វភ្នំតាម៉ៅនេះ គឺយើងបានធ្វើផ្លូវខណ្ឌ កាត់ផ្តាច់ ការពារភ្លើងឆេះព្រៃជាច្រើនខ្សែ ហើយយើងក៏មិនដឹងពីមូលហេតុ ដែលអង្គការWild life Alliance ធ្វើការជាមួយសួនសត្វភ្នំតាម៉ៅរៀងរាល់ថ្ងៃ បានប្រាប់កាសែតទៅកាសែតបរទេសថា ការធ្វើផ្លូវនោះ គឺដើម្បីតែផលប្រយោជន៍ផ្ទាល់ខ្លួន អភិវឌ្ឍន៍ គម្រោងវិនិយោគឯកជន ធ្វើឲ្យប៉ះពាលធនធានព្រៃឈើដែលក្រសួងកំពុងខំប្រឹងការពារទៅវិញ។

ប្រធានអង្គការWild life Alliance លោក នឹក ម៉ាក សុំមិនបកស្រាយអំពីបញ្ហានេះទេ តែបើតាម លោក Joe Rose អង្គការ FFI អភិរក្សសត្វក្រពើសួនសត្វភ្នំតាម៉ៅ បានថ្លែងថា អង្គការគាំទ្រឲ្យមានការធ្វើផ្លូវការពារភ្លើងឆេះព្រៃ ហើយការធ្វើផ្លូវនោះគឺផ្តល់ប្រយោជន៍ដល់ពលរដ្ឋធ្វើដំណើរផង និងការពារធនធនព្រៃអភិរក្សរបស់យើងផង។

សូមបញ្ជាក់ថា ឧទ្យានសួនសត្វព្រៃការពារភ្នំតាម៉ៅ មានផ្ទៃដីសរុបប្រមាណជាង២០២៥ហិចតា និងបានកំពុងពង្រីកធ្វើរបង ធ្វើផ្លូវការពារភ្លើងឆេះព្រៃបានប្រមាណជាង២០គីឡូម៉ែត និងមានផ្លូវបង្ការភ្លើងឆេះព្រៃនៅក្នុងសួនជាច្រើនខ្សែផងដែរ ហើយក្នុងឧទ្យាននោះ មិនមានគម្រោងលក់ដីដើម្បីវិនិយោគ និងអភិវឌ្ឍន៍នោះទេ៕ អត្ថបទ ៖ ស៊ុម សុខជា