តាកែវ ៖ នាយកគ្រប់គ្រងអង្គការ Wildlife Alliance បានចេញលិខិតបដិសេធចំពោះកាសែតបរទេស VOD មួយបានធ្វើការដកស្រង់សំដីរបស់លោក Nick Marx ដែលជាបុគ្គលិកអង្គការខ្លួន យកទៅផ្សាយខុសការពិត និងធ្វើឲ្យមហាជនភ័នច្រឡំ អំពីការឈូសឆាយធ្វើផ្លូវបង្ការភ្លើងឆេះព្រៃ និងការងារអភិវឌ្ឍនៅតំបន់សួនសត្វភ្នំតាម៉ៅ។

​នៅក្នុងសេចក្តីប្រកាសព័ត៌មាន របស់អង្គការWildlife Alliance ចេញផ្សាយនៅថ្ងៃទី១១ ខែធ្នូ នេះ បានបញ្ជាក់ថា ជាក់ស្តែង លោក Nick Marx បានផ្តល់បទសំភាសន៍ខ្លីមួយ ឲ្យទៅកាសែតបរទេសVOD ថា អង្គការរបស់លោក មិនប្រឆាំងការអភិវឌ្ឍ ប៉ុន្តែព្រៃឈើទាំងឡាយនោះ គឺត្រូវតែទទួលបានការពារ ខ្លីប៉ុណ្ណឹងទេ ប៉ុន្តែបែរជាអ្នកកាសែតVOD យកសំដីខ្លីនេះ យកទៅប្រឌិតព័ត៌មាន បំភ្លើសបំភ្លៃបន្ថែមពីលើសំដីគាត់ ធ្វើឲ្យព័ត៌មានដែលផ្សាយនោះ គឺខុសពីរឿងរ៉ាវពិតជាក់ស្តែង ដែលអង្គការ Wildlife Alliance បាននិងកំពុងធ្វើយ៉ាងសកម្មភាពជាមួយក្រសួងកសិកម្ម រុក្ខាប្រមាញ់ និងនេសាទ លើការងារអភិរក្សសត្វព្រៃ និងព្រៃឈើនៅតំបន់ឧទ្យានសួនសត្វព្រៃការពារ ភ្នំម៉ៅ។

តាមរយៈសេចក្តីប្រកាសព័ត៌មានរបស់អង្គការ Wildlife Alliance នេះ អង្គការសូមចាត់ទុកថា ការផ្សាយព័ត៌មានរបស់កាសែតបរទេសVODមួយនេះ គឺជាព័ត៌មានមិនពិត និងយកសំដីរបស់លោក Nick Marx ទៅប្រើប្រាស់ក្នុងចេតនាអាក្រក់ ដើម្បីកេងចំណេញផលប្រយោជន៍ ហើយបង្ខូចរូបភាពពិតរបស់អង្គការ Wildlife Alliance។ 

អង្គការ Wildlife Alliance បានធ្វើការងារសហការយ៉ាងជិតស្និតជាមួយក្រសួងកសិកម្ម រុក្ខាប្រមាញ់ និងនេសាទ តាំងពីឆ្នាំ២០០១ ហើយតាមរយៈ សេចក្តីប្រកាសព័ត៌មាននេះ អង្គការ Wildlife Alliance សូមប្រកាសគាំទ្រ បន្តការអភិវឌ្ឍន៍ និងរួមគ្នាអភិរក្សព្រៃឈើ ធនធានធម្មជាតិ ជួយសង្គ្រោះសត្វព្រៃដែលរងការជួញដូរ ព្រមទាំងផ្តល់ការថែទាំរួមគ្នា តាមវិជ្ជាជីវៈត្រឹមត្រូវ ទៅដល់សត្វទាំងនោះ ហើយនឹងព្រលែងចូលព្រៃធម្មជាតិ នៅពេលសត្វទាំងនោះជា៕ អត្ថបទ ៖ ស៊ុម សុខជា