គណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា និង​ក្រសួងមុខងារសាធារណៈ បានរៀបចំកិច្ចប្រជុំរួមគ្នា ជាលើកដំបូងក្នុងអាណត្តិទី៧ នៃរដ្ឋសភា។ កិច្ច​ប្រជុំពិភាក្សានេះ រៀបចំឡើងដើម្បី ស្វែងយល់អំពីវឌ្ឍនភាពការងារ និង​ទិសដៅ​អនុវត្ត​បន្ត​របស់​ក្រសួង​មុខងារសាធារណៈ ក្នុងការអនុវត្តកម្មវិធីនយោបាយ និងយុទ្ធសាស្ត្រ​បញ្ចកោណ​របស់​រាជ​រដ្ឋាភិបាល អាណត្តិទី៧ ក្រោមការដឹកនាំរបស់សម្តេច ធិបតី ហ៊ុន ម៉ាណែត។

កិច្ចប្រជុំជាលើកដំបូងនេះ ត្រូវបានរៀបចំឡើងនៅថ្ងៃទី១១ ខែធ្នូ ឆ្នាំ ២០២៣ ដោយ​មាន​ការ​ចូល​រួម​ពី ឯកឧត្តម កែប ជុតិមា សមាជិករដ្ឋសភា និងជាប្រធានគណៈកម្មការទី៤ នៃរដ្ឋសភា និង​ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ព្រម​ទាំង​វត្ត​មាន​ចូល​រួម​ពី​សំណាក់​មន្ត្រី នៃ​អង្គភាពទាំងពីរ។

ក្នុងជំនួបនេះដែរ ឯកឧត្តមរដ្ឋមន្ត្រី ហ៊ុន ម៉ានី បានរាយការណ៍​ពី​វឌ្ឍនភាព​ការងារ​របស់​ក្រសួង​មុខងារ​សាធារណៈ​នា​ពេល​កន្លង​មក​ស្រប​តាម​បេសកកម្ម​ដែល​ក្រសួង​បាន​ដាក់​ចេញ​ដើម្បី​ឆ្លើយ​តប​នឹង​ចក្ខុវិស័យរបស់រាជរដ្ឋាភិបាល។ ឯកឧត្តម ក៏បានគូសបញ្ជាក់នូវការងារជាសារវន្តចំនួន៣ ក្នុង​ការលើកកម្ពស់សមត្ថភាព ប្រសិទ្ធភាព និងសមិទ្ធកម្ម ក្នុងរដ្ឋបាលសាធារណៈ តាមរយៈ ការ​កែ​លម្អប្រព័ន្ធជ្រើសរើសមន្ត្រី ការលើកកម្ពស់ប្រសិទ្ធភាពការងារក្នុងរដ្ឋបាលសាធារណៈ និង ការរៀបចំប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ។

ក្រោយពីស្តាប់នូវការលើកឡើងរដ្ឋមន្រ្តីរួចមក ឯកឧត្តម កែប ជុតិមា បានកោតសរសើរ និង​វាយ​តម្លៃ​ខ្ពស់​ចំពោះសមិទ្ធផលដែលក្រសួងសម្រេចបាន និងថ្លែង​អំណរ​គុណ​ចំពោះ​កិច្ច​សហការ​ដ៏​ល្អ​រវាង​ក្រសួង​មុខងារសាធារណៈ និងគណៈកម្មការរដ្ឋសភា ក្នុងអាណត្តិកន្លងមក។ ឯកឧត្តម​សង្ឃឹម​ថា ក្នុងអាណត្តិថ្មីទី៧នេះ ក្រសួងមុខងារសាធារណ: នឹងសម្រេច​បាន​លទ្ធផល​បន្ត​បន្ទាប់​ទៀត​ជូន​ជាតិ និងប្រជាពលរដ្ឋ។

កិច្ចប្រជុំលើកដំបូងក្នុងអាណត្តិទី៧ នៃរដ្ឋសភា រវាងគណៈកម្មការទី៤ នៃរដ្ឋសភា និង​ក្រសួង​មុខងារ​សាធារណៈ មិនត្រឹមតែជាការជម្រាបជូនជារបាយការណ៍ជូន គណៈកម្មការទី៤ នៃ​រដ្ឋសភា​តែ​ប៉ុណ្ណោះទេ ប៉ុន្តែវាជា​ការ​បង្ហាញ​ឆន្ទៈ​ដ៏​មោះមុត​ក្នុង​ការ​អនុវត្ត​វិធានការ​គន្លឹះ​នៃ​ការ​កែ​ទម្រង់​រដ្ឋបាលសាធារណៈ ក្រោមការចង្អុលបង្ហាញ និងការតម្រង់ទិសរបស់សម្តេច បវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕ អត្ថបទ៖គឹម ហុក