​បាល់ទាត់៖ ពានរង្វាន់​លក្ខណៈ​មិត្តភាព និង​ពង្រឹង​សមត្ថភាព​ត្រៀម​ការប្រកួត​ត្រឡប់មកវិញ នៃ​លី​គ​កំពូល​កម្ពុជា​គឺ​ពានរង្វាន់ League Cup 2021 បាន​រក​ឃើញ​បេក្ខភាព​ឡើង​វគ្គ​ពាក់​កណ្ដាល​ផ្ដាច់ព្រ័ត្រ​ហើយ រួមមាន​ក្រុម​វិសាខា​, ISI ដង្កោ​សែន​ជ័យ​, ព្រះខ័ន​រាជ​ស្វាយរៀង និង​ក្រុម​កង​យោធពល​ខេមរភូមិន្ទ មុន​បញ្ចប់​ការប្រកួត​សន្សំ​ពិន្ទុនា​ថ្ងៃ​ទី​១៩ ខែ​មិថុនា​ចុង​សប្ដាហ៍​នេះ។​

​ចំពោះ​ក្រុម​វិសាខា និង ISI ដង្កោ​សែន​ជ័យ គឺជា​បេក្ខភាព​ទទួលបាន​កៅអី​វគ្គ​ពាក់កណ្ដាល​ផ្ដាច់ព្រ័ត្រ​ស្វ័យប្រវត្តិ​ពី​ពូ​ល A បន្ទាប់ពី​គូប្រជែង ២​ក្រុមត្រូវបាន​ដកចេញ​ពី​ការប្រកួត ក្រោយ​រកឃើញ​ករណី​សង្ស័យ​វិជ្ជមាន​កូ​វីដ​-១៩ គឺ​ក្លិប​បឹងកេត និង​ភ្នំពេញ​ក្រោ​ន។ ប៉ុន្ដែ​មុន​ឡើង​វគ្គ​បន្ដ វិសាខា និង ISI ដង្កោ​សែន​ជ័យនឹងត្រូវ​ជួបគ្នា​បង្គ្រប់កិច្ច​ពូ​ល A នា​ថ្ងៃ​សៅរ៍​ចុង​សប្ដាហ៍​នេះ នៅ​ទីលាន KMH Park។​ ​ចំណែក​ក្រុម​ព្រះខ័ន​រាជ​ស្វាយរៀង និង​ក្រុម​កងយោធពល​ខេមរភូមិន្ទ គឺជា​បេក្ខភាព​វគ្គ​ពាក់កណ្ដាល​ផ្ដាច់ព្រ័ត្រ​ឡើងមក​ពី​ពូ​ល B បន្ទាប់ពី​ក្រុម​ទាំងពីររកបាន ៦​ពិន្ទុ​ស្មើគ្នា មុន​ក្រុម​ទាំងពីរជួបគ្នា​បង្គ្រប់កិច្ច​ពូ​ល B នា​ថ្ងៃ​សៅរ៍​ចុង​សប្ដាហ៍​នេះនៅ​កីឡដ្ឋាន​ខេត្តស្វាយរៀង ដើម្បី​កំណត់​ក្រុម​លេខ​១ និង​លេខ​២ ក្នុង​ពូ​ល ហើយ​ធ្វើការ​ប្រកួត​ខ្វែង​ពូ​ល​ជាមួយ​ក្រុម​វិសាខា និង ISI ដង្កោ​សែន​ជ័យនៃ​ពូ​ល A។​

​សូមបញ្ជាក់ថា សម្រាប់​ការប្រកួត​វគ្គ​ពាក់កណ្ដាល​ផ្ដាច់ព្រ័ត្រ នៃ​ពានរង្វាន់ League Cup 2021 នឹង​ប្រព្រឹត្ត​ទៅនា​ថ្ងៃទី​២៣ ខែមិថុនាដើម្បី​ស្វែងរក​បេក្ខភាព​វគ្គ​ផ្ដាច់ព្រ័ត្រ​បន្ដ ស្របពេល​ការប្រកួត​កំណត់​ជើងឯក​ពាន​លក្ខណៈ​មិត្តភាព​នេះ គ្រោង​នឹងធ្វើ​ឡើងនា​ថ្ងៃទី​២៧ ខែមិថុនា ឆ្នាំ​២០២១ ខាងមុខ មុន​ការប្រកួត​ក្របខណ្ឌ​លី​គ​កំពូល​កម្ពុជា ត្រឡប់មកវិញនា​ដើមខែ​កក្កដា​ខាងមុខ៕

​អត្ថបទ៖ លី ឈុន​ឡា